‘आउटलः दफा २१९’को टिजर रिलिज: सुशीललाई ‘एक्सन स्टार’को ट्याग !
काठमाडौं । असोजको ३ गतेबाट रिलिजमा आउन लागेको फिल्म आउटलः दफा २१९’ को टिजर सार्वजनिक गरिएको छ । सोमबार सार्वजनिक टिजर एक्सन प्याक्ड छ । टिजरमा प्रमुख अभिनेता सुशील श्रेष्ठलाई एक्सन स्टारको ट्याग दिइएको छ ।
अभिनेता श्रेष्ठ फुलप्याक एङ्ग्री अबतारमा छन् । टिजर पूर्णत:कमर्सियल देखिन्छ । विक्की महर्जनको लेखन तथा निर्देशनमा तयार भएको यो फिल्ममा अमित अग्रहरि निर्माताको रुपमा छन् । विनोद कठायत कार्यकारी निर्माता रहेको फिल्ममा विकास चौधरी सह–निर्माताको रुपमा छन् ।
फिल्ममा नविन गुरुङको डीओपी, चुल्ठे काजीको एक्सन निर्देशन, साहिल खानको सम्पादन छ । यो फिल्ममा सुशिल श्रेष्ठ, नरेश पौडेल, शिक्षा संग्रौला, सुमन भण्डारी, हेम गुरुङ, सोनी लागुन, विशाल पहारी लगायतका कलाकारहरुको अभिनय छ ।
सार्वजनिक टिजरमा फिल्मको कथावस्तुको सामान्य जानकारी मात्र दिन खोजिएको छ । सम्पादक शाहिल खानले आकर्षक ब्याकग्राउन्ड म्युजिकका साथमा टिजर तयार पारेका छन् ।
संविधान दिवसको दिन रिलिज हुने यो फिल्मले उठाएको कथावस्तु दर्शकका लागि पनि विशेष हुने यसको निर्माणपक्षको दाबी छ ।
