‘घर नम्बर २’मा निश्चल बस्नेत अनुबन्धित
काठमाडौं । फिल्म ‘के घर के डेराः घर नम्बर २’ मा प्रमुख अभिनय रहनेगरि निश्चल बस्नेत अनुबन्धित भएका छन् । उनले अब यो फिल्मको कास्टिङ लाइनअपमा अभिनेता खगेन्द्र लामिछानेसँग सहकार्य गर्नेछन् ।
फिल्मको मुख्य भूमिकामा बस्नेतलाई अनुबन्धित गरिएको निर्देशक दीपेन्द्र के खनालले जानकारी दिए । यसअघि यो फिल्ममा अभिनेता खगेन्द्र लामिछानेको प्रवेश भइसकेको छ । फिल्मका लागि अझै ४ जना कलाकारहरुलाई मुख्य भूमिका अनुवन्धित गर्न बाँकी रहेको निर्माणपक्षले बताएको छ ।
ए प्लस इन्टरटेन्मेन्ट र नटराज क्रियशनको ब्यानरमा निर्माण हुन लागेको यो फिल्मको कथा बुद्धिसागरले लेखेका हुन् । फिल्ममा शरद श्रेष्ठ, किरण महर्जन र राजिव श्रेष्ठ निर्माताको रुपमा छन् । युवराज कार्की फिल्मका कार्यकारी निर्माता हुन् ।
फिल्मलाई काठमाडौंमा रिच इन्टरटेन्मेन्ट र काठमाडौं बाहिर एफडी कम्पनीले वितरण गर्ने पक्का भइसकेको छ । सामाजिक कथावस्तुमा निर्माण हुने यो फिल्मलाई यसै बर्ष रिलिज गर्ने योजनामा निर्माणपक्ष छ । यहि साउन २५ गतेबाट छायांकनमा जाने तयारीमा निर्माण युनिट छ ।
