‘ह्रस्व दीर्घ’मा रेखाको सरप्राइज !
काठमाडौं । अनुबन्धित कलाकारहरूको नाम घोषणादेखि नै फिल्म ‘ह्रस्व दीर्घ’ चर्चामा छ । यो फिल्ममा वलिउड र दक्षीण भारतीय फिल्मका दिग्गज कलाकारहरूको अभिनय छ भने नेपालबाट फ्रण्टलाइनमा नाम चलेका अनुहारहरू फिल्ममा छन् ।
यो बीचमा कलाकार आवद्धतमा अनेकन सरप्राइज दिएको फिल्मको कस्टिङ लाइनअपमा नयाँ सरप्राइज थपिएको छ । फिल्ममा अभिनेत्री रेखा थापाको रहस्यमय उपस्थिति देखिएको छ ।
प्राप्त तश्विरमा रेखालाई ‘ह्रस्व दीर्घ’को छायांकन सेटमा देख्न सकिन्छ । जहाँ निर्देशक चन्द्र पन्त र निर्मात्री अभिनेत्री नीता ढुङ्गानासँग स्कृप्टमा छलफल गरिरहेको छनक तश्वीरले दिन्छ ।
निर्देशक चन्द्र पन्तले फिल्ममा थापाको छोटो तर महत्त्वपूर्ण उपस्थित रहेको बताए । हलमा आउँदा हाम्रो फिल्ममा लेडि किङ थापाबाट दर्शकले ठूलो सरप्राइज पाउने उनको दाबी छ । यो फिल्म संविधान दिवसको अवसरमा असोज ३ मा रिलिज हुँदैछ ।
निर्मात्री नीताले हाल फिल्मको प्रोष्ट प्रडक्सनको काम चलिरहेको र एउटा गीत छायांकनको लागि टिम मुम्बई जाने तयारीमा रहेको बताइन् । उक्त डान्सिङ नम्बरलाई वलिउडका चर्चित कोरियोग्राफरले नृत्य निर्देशन गर्ने उनले बताइन् ।
नीता फिल्मस् को ब्यानरमा तयार यो फिल्ममा निर्मात्री रहेकी अभिनेत्री नीतासँगै, अभिनेता हरिहर अधिकारी, चर्चित दक्षिण भारतीय कलाकार व्रह्मानन्दम, अलि, सुनिल बर्मा, कबिर दुहान वलिउड कलाकार प्रदीप रावतसँगै विपना थापा, गरिमा शर्मा, प्रशान्त ताम्राकार, सरोज खनाल, सञ्चिता लुइँटेल, बुद्धि तामाङ, किरण केसी, प्रशान्त ताम्राकार, रविन्द्र झा लगायत नाम चलेका दर्जनबढि कलाकारहरू अभिनयमा छन् ।
सोसियल ड्रामा सहितको प्रेमकथामा आधारित यो फिल्मलाई भारतको रामोजी स्टुडियोदेखि मुम्बई, चितवन र काठमाडौंमा छायांकन गरिएको छ । अभिनेता हरिरहरको कथामा तयार फिल्ममा वलिउडका स्थापित सिनेमाटोग्राफर कविरलालको छायांकन छ । फिल्ममा मित्र डि गुरुङको सम्पादन छ ।
