‘आँखा’को रिलिज पोष्टपोण्ड, असार १४ मा नआउने
काठमाडौं । यहि असार १४ लाई प्रदर्शन मिति तोकेको फिल्म ‘आँखा’को रिलिज पोष्टपोण्ड भएको छ । निर्माण टिमले प्राविधिक कारणबस उक्त मितिमा फिल्म रिलिज गर्न नसकिएको जानकारी दिएको छ । यसैसाता फिल्मको नयाँ रिलिज मिति घोषणा गरिने निर्देशक जौन योन्जनले बताए ।
लामा सिनेमा प्रालीको ब्यानरमा तयार यो फिल्मले सामाजिक परिवेशको कथा बोल्छ । निर्देशक योन्जनले फिल्मको नयाँ पोस्टर र टिजर सार्वजनिक गर्दै नयाँ मिति तय गर्ने तयारी रहेको बताए ।
नेपाली रंगमञ्चमा अब्बल उपस्थिति जनाएका कलाकारहरूको जम्बो टिम रहेको फिल्मको निर्माण टिमले यसअघि फर्स्टलुक सार्वजनिक गरिसकेको छ । जहाँ फिल्म मनोरञ्जनसँगै कन्टेन्ट ओरिन्टेड देखिन्छ । विभिन्न प्रचार सामग्री सार्वजनिक गर्दा फिल्मको थप कथा रिभिल गर्दै जाने निर्देशक बताउँछन् ।
निर्देशक योन्जनकै कथा, पटकथा रहेको फिल्ममा स्मिता लामिछाने,आरके मेहता, निशा अधिकारी,बुद्धि तामाङ, विजय बराल, सरोज खनाल, पशुपति राई, कृष्णभक्त महर्जन, राजन खतिवडा, प्रविण खतिवडा, लुनिभा तुलाधर, रविन्द्र झा, रेनुका कार्की, अभयराज बराल मुख्य अभिनयमा छन् । बाल कलाकारको भुमिकामा प्रसन राई छन् ।
निर्देशक रहेका योन्जन नै निर्माता रहँदा फिल्ममा कृष्ण भण्डारी र योन्जन कै सम्पादन छ । आलोक शुक्लाको छायांकन रहेको फिल्ममा ध्वनी मुद्रण किशोर आचार्यको रहँदा पार्श्व संगीत गंगा थापाको छ । । ढाका टोपी फिल्मस्, कार्यक्रम नेपाल, साइलेन्ट एक्ट र ट्राइडेन्ट कन्सेप्टको सहकार्यमा यो फिल्म तयार भएको हो ।
