अनमोलको जन्मदिनमा ‘फर्की फर्की’ फर्स्टलुक सार्वजनिक
काठमाडौं । युवा स्टार अनमोल केसीको जन्मदिनको अवसर पारेर फिल्म ‘फर्की फर्की’को फर्स्टलुक पोस्टर रिलिज गरिएको छ । आउँदो बर्षको जेठ १० गतेबाट रिलिजमा आउन लागेको यो फिल्मको पोस्टरमा अनमोललाई मात्र स्थान दिइएको छ ।
अनमोलका यसअघिका लभस्टोरी फिल्मको पोस्टर भन्दा यो पोस्टर विल्कुलै फरक छ । फिल्मको पोस्टरले ‘टाइम ट्राभल’को झल्को दिन्छ ।
लभस्टोरी जनरामा बनेको यो फिल्मलाई ओम प्रकाश अग्रवालसँग मिलेर रोहित अधिकारीले निर्माण गरेका हुन् । फिल्ममा मनोज ओली र रामु न्यौपाने सह-निर्माताको रुपमा छन् ।
फिल्म ‘फर्की फर्की’लाई सुयोग गुरुङले निर्देशन गरेका हुन् । फिल्ममा अनमोल केसीको साथमा अभिनेत्री जसिता गुरुङको मुख्य भूमिका छ । साथमा फिल्ममा रवि काफ्ले, समृद्धि अर्याल, कृष्ण मल्ल, निर्मल शर्मा लगायतका कलाकारको पनि अभिनय छ ।
सुयोग गुरुङकै कथा तथा पटकथा रहेको यो फिल्ममा रोमन बज्राचार्य र नरेन लिम्बुको संगीत, नरेन्द्र मैनालीको डीओपी, सुरेन्द्र पौडेलको सम्पादन, किरण थापाको कोरियोग्राफी छ ।
फिल्म ‘फर्की फर्की’लाई लिएर अनमोल निकै उत्साहित छन् । यो फिल्मको कथावस्तु आफूले यसअघि काम गरेका फिल्मको भन्दा फरक रहेको भन्दै अनमोलले दर्शकको माया पाउने विश्वास व्यक्त गरे ।
