रुखान’को प्रमुख अभिनेत्रीमा नीति शाह अनुबन्धित
काठमाडौं । सविर श्रेष्ठको निर्देशनमा निर्माण हुन लागेको फिल्म ‘रुखान’को लागि अभिनेत्री फाइनल गरिएको छ । यो फिल्मको मुख्य भूमिकामा नीति शाहले काम गर्ने पक्का भएको हो ।
निर्माणपक्ष र नीतिबिच कागजी सम्झौता भएको छ । ४ वटा भाषामा निर्माण हुन लागेको यो फिल्मलाई लिएर आफू निकै नै उत्साहित रहेको नीतिले बताइन् । यो फिल्ममा नीति एक बिद्रोही महिलाको भूमिकामा देखिदैछिन् ।
यो फिल्मलाई नेपाली, हिन्दी, अंग्रेजी र भोजपुरी भाषामा बनाउने तयारी निर्माण पक्षको छ । कृष्ण थापा (अष्ट्रेलिया) र सुरेश गुरुङको निर्माणमा बन्ने यो फिल्ममा डाक्टर रुपक घिमिरेको कथा छ । फिल्मका कार्यकारी निर्माता सविन श्रेष्ठ हुन् । फिल्ममा अर्जुन पोखरेलको संगीत, अभिमन्यू निरवीको पटकथा तथा संवाद रहनेछ ।
यो फिल्म सविन फिल्मस्, भिक्टोरी प्रोडक्शन हाउस प्रा.लि र काइट्स इन्टरटेन्मेन्टको ब्यानरमा निर्माण हुन लागेको हो । फिल्मको निर्माणमा आवरण स्किन हेयर क्लिनिकले पनि सहकार्य गरेको छ ।
फिल्मले सिंगो देशका नागरिकहरुले समस्याबाट जुध्दै गर्ने संघर्षलाई देखाउने निर्देशक सविर श्रेष्ठले बताएका छन् । उनका अनुसार महिलाको संघर्षको कथा फिल्मले बोल्नेछ ।
