फर्स्टलुकमा विपिन र मिरूनाको ‘ऊनको स्वीटर’
काठमाडौं । नवीन चौहानको डेब्यू निर्देशनमा बन्ने फिल्म ‘ऊनको स्वीटर’को फर्स्टलुक पोस्टर सार्वजनिक गरिएको छ । सार्वजनिक पोस्टरमा फिल्मका प्रमुख कलाकार विपिन कार्की र मिरुना मगर फिचर्ड छन् ।
सार्वजनिक पोस्टरमा विपिन ऊनको स्वीटरमा ‘टिपिकल’ नेपाली युवक देखिएका छन् भने मिरुना नेपाली मगर संस्कृति झल्काउने पोशाकमा सजिएकी छन् । पोस्टरले २०/२५ वर्ष पहिलेसम्म नेपालमा तश्वीर खिचाउँदा प्रयोग हुने शैलीलाई संकेत गरेको छ । यो फिल्म अन्तरजातीय प्रेमसहितको सामाजिक कथावस्तुमा बन्न लागेको पोस्टरले भान दिन्छ ।
आर्टमाण्डुको निर्माणमा बन्ने यो फिल्ममा विपिन र मिरुनासँगै माओत्से गुरुङ, एलेक्स विश्वकर्मा (पारस), परीक्षा लिम्बु लगायतको अभिनय रहनेछ । फिल्मको कथा निर्देशक चौहानकै हो । आगामी बैशाखबाट फिल्मको छायांकन सुरू हुने बताइएको छ ।
आर्टमाण्डुको निर्माणमा सामाजिक कथा झल्किने विभिन्न म्युजिकल फिल्म निर्माण हुँदै आएका छन् । निर्देशक चौहानसँग अभिनेता विपिनले म्युजिकल फिल्ममा पटक-पटक सहकार्य गरिसकेका छन् ।
