‘पिताम्बर’मा प्रदीप भर्सेज अनुपबिक्रम, हिरोइनमा आँचल कन्फर्म
काठमाडौं । कृषा चौलागाइँको निर्देशनमा बन्न लागेको एक्सन प्रधान फिल्म ‘पिताम्बर’को कास्टिङ लाइनअप बलियो बन्दै गएको छ । प्रमुख अभिनयमा अभिनेता प्रदीप खड्कालाई पक्का गरेको निर्माण टिमले हालै अर्को प्रमुख पात्रमा अभिनेता अनुपबिक्रम शाहीलाई अनुबन्ध गरेको छ ।
आइतबार अभिनेता शाही र निर्माण टिमबीच कागजी सम्झौता समेत भइसकेको छ । अनुपले आफुले हालसम्म नगरेको फरक किसिमको पात्रको अफर गरिएकोले कथावस्तुले लोभ्याउँदा आफु टिमबाट टाढा बस्न नसकेको प्रतिक्रिया दिए ।
यस्तै प्रमुख अभिनेत्रीमा आँचल शर्मालाई भित्र्याएको छ । प्रदीप र अनुप दुबैसँग आँचलको यो पहिलो सहकार्य रहनेछ । अनुपसँग आँचलले यसअघि एक म्युजिक भिडियोमा भने जोडी बाँधिसकेकी छिन् । यो फिल्ममा यसअघि नै अर्की अभिनेत्री सुरक्षा पन्त जोडिइसकेकी छिन् ।
केपी फिल्मस् को ब्यानरमा बन्ने फिल्मले तराइ मधेश क्षेत्रको आपराधिक गतिविधिलाई पर्दामा बोल्नेछ । तीन चरणमा छायांकन हुने भनिएको फिल्मलाई अर्को वर्ष २०८१ मा दर्शकमाझ ल्याउने निर्माण टिमले बताएको छ ।
पछिल्लो समय एकपछि अर्को फिल्ममा अनुबन्ध भइरहेका प्रदीप यतिबेला ‘पूजार सार्की’को छायांकन तयारीमा छन् भने अर्का अभिनेता अनुपबिक्रमले हालै अर्को एक्सन ड्रामा ‘म्याउँ’मा समेत अनुबन्ध भएसकेका छन् । उनि अभिनित फिल्म ‘जार’ प्रदर्शनको तयारीमा रहँदा हिमालय रोडिज र पेय पदार्थ ‘माउन्टेन ड्यू’को बजारमा प्रवर्धनमा उनि व्यस्त छन् । यस्तै अभिनेत्री आँचलले हालै फिल्म ‘डिग्री माइला’को छायांकन सकेर बसेकी छिन् ।
