फिल्म प्रचारको बहानामा ‘हात्तिछाप’को स्वास्थ्य शिविर !
काठमाडौं । सिमोस सुनुवारको निर्देशनमा बनेको फिल्म ‘हात्तिछाप’ले प्रचारको बहानामा स्वास्थ्य शिविर चलाएको छ । गत माघको १३ गते ‘हात्तीछाप’को टिमले लायन्स क्लबसँगको सहकार्यमा किस्पाङ २ सातदोबाटोमा निःशुल्क स्वास्थ्य शिविरको आयोजना गर्यो ।
जहाँ, उपस्थित भएका नागरिकहरुलाई निःशुल्क उपचारका साथै औषधी वितरण समेत गरिएको फिल्मका प्रस्तुतकर्ता किरण नेपालीले जानकारी दिए । शिविरमा देखिएका जटिल रोगका बिरामीहरुलाई काठमाडौंको टिचिङ अस्पतालमा सहजीकरण गरिने नेपालीको भनाई छ । बृहत्त स्वास्थ्य शिविरमा सात सय बढी नागरिकहरुले निःशुल्क स्वास्थ्य परिक्षण गरेका थिए । यस्तै, उक्त शिविरमा १५ लाख भन्दा बढीको औषधी निःशुल्क वितरण गरिएको थियो ।
यो शिविरमा टिचिङ अस्पतालका ४९ जना डाक्टरहरुले नागरिकहरुको स्वास्थ्य परिक्षण गरेका थिए । फिल्म ‘हात्तीछाप’का प्रस्तुतकर्ता नेपाली भन्छन्–‘हामीले फिल्मलाई व्यवसायिक कोणबाट मात्र हेर्नु हुदैन । फिल्मलाई सामाजिक सेवामा पनि लगाउन सक्नुपर्छ । यसैले, हामीले यो स्वास्थ्य शिविरको आयोजना गरेका हौं ।’
यहि माघ २६ बाट प्रदर्शनमा आउने फिल्ममा दयाहाङ राई, सौगात मल्ल, उपासना सिंह ठकुरी, विजय बराल, वुद्धि तामाङ, पुष्कर गुरुङ, बेनिशा हमाल, कमलमणी नेपाल, सुष्मा निरौला, विल्सन विक्रम राई लगायतका कलाकारको अभिनय छ ।
