‘अगस्त्य’मा सौगातसँग रोमान्टिक मलिका
काठमाडौं । आगामी फागुन १८ गतेबाट रिलिज हुने फिल्म ‘अगस्त्य च्याप्टर १’ मा समावेश अभिनेत्री मलिका महतको क्यारेक्टर पोस्टर सार्वजनिक गरिएको छ । यसअघि अभिनेताद्वय सौगात मल्ल र नाजिर हुसैनको पात्र चित्रण सार्वजनिक गरेको निर्माण टिमले सोमबार मलिकालाई सार्वजनिक गर्यो ।
यो फिल्ममा मलिका ‘चाँदनी’को भूमिकामा देखिदैछिन् । मलिकालाई एक पोस्टरमा एक्लै र अर्कोमा सौगातसँग रोमान्टिक अबतारमा देख्न सकिन्छ ।
सौरभ चौधरीको निर्देशनमा तयार भएको यो फिल्ममा कलाकार तथा निर्देशक निश्चल बस्नेतको पनि अभिनय रहेको निर्माण टिमले खुलाएको छ । फिल्ममा प्रमोद अग्रहरी, विजय बराल, रवीन्द्र झा लगायतका कलाकारको पनि मुख्य भूमिका छ ।
डार्क हर्स इन्टरटेन्मेन्ट र सेभेन सिज इन्टरटेन्मेन्टको प्रस्तुतिमा तयार भएको यो फिल्ममा प्रकाश मल्ल, अनिष तामाङ र विनोद पौडेलको लगानी छ । फिल्मका कार्यकारी निर्माता विश्व गौचन र अभिषेक चौधरी हुन् ।
