हेर्नुहोस् ‘अगस्त्य’ भित्र नाजीरका पाँच फरक अबतार
काठमाडौं । फागुनको १८ गतेबाट रिलिजमा आउन लागेको फिल्म ‘अगस्त्यः च्याप्टर १’मा अभिनेता नाजिर हुसैनले निभाएका पाँच अबतार सार्वजनिक गरिएको छ । एक पोस्टर सार्वजनिक गर्दै निर्माण टिमले नाजिरको पात्र चित्रण गर्ने पाँच अबतार आउट गरेको हो ।
प्रमुख अभिनेता सौगात मल्ल फिचर्ड फर्स्टलुक पोस्टर सार्वजनिक गर्दा चर्चा कमाएको फिल्ममा सार्वजनिक नाजिरको भुमिकाले पनि दर्शकमा कौतुहलता जनाउने बनाउँछ । नाजिरले फिल्ममा आफूलाई ५ फरक गेटअपमा प्रस्तुत गरेको यसका लेखक तथा निर्देशक सौरभ चौधरीले जानकारी दिए ।
निर्माणपक्षले दिएको जानकारी अनुसार, नाजिरले यो फिल्मका लागि २० केजी तौल बढाएका थिए । सार्वजनिक पोष्टरमा नाजिरको फिल्ममा सुरुवातदेखि अन्तिमसम्मको भूमिकालाई प्रस्तुत गरिएको बुझिन्छ । यो फिल्ममा सौगात मल्ल, नाजिर हुसैन, मलिका महत, प्रमोद अग्रहरी, विजय बराल, रवीन्द्र झा लगायतका कलाकारको अभिनय छ ।
यो फिल्ममा नाजिर ‘निशान’ पात्रको भूमिकामा देखिनेछन् । डार्क हर्स इन्टरटेन्मेन्ट र सेभेन सिज इन्टरटेन्मेन्टको प्रस्तुतिमा तयार भएको फिल्ममा प्रकाश मल्ल, अनिष तामाङ र विनोद पौडेलको लगानी छ । फिल्मका कार्यकारी निर्माता विश्व गौचन र अभिषेक चौधरी हुन् ।
