‘साइको किलर’ बन्दै अनुपबिक्रम, माघे संक्रान्तीमा ‘म्याउँ’ घोषणा
काठमाडौं । अभिनेताद्वय अनुप विक्रम शाही र उत्तम प्रधानको प्रमुख अभिनय रहनेगरि फिल्म ‘म्याउँ’ घोषणा भएको छ । माघे संक्रान्तीको अवसर पारेर निर्माण टिमले फिल्मको थीम पोस्टर रिलिज गर्यो । सार्वजनिक पोस्टरमा प्रथम भाग घोषणा उल्लेख गरिएको छ ।
फिल्ममा लेखन, निर्देशन तथा निर्माण जयराज रायको रहनेछ । जय मिडिया म्यानेजमेन्टको प्रस्तुतिमा बन्ने यस फिल्ममा प्रमुख भूमिकाको लागि अभिनेत्रीको भने टुङ्गो नलागेको निर्देशक रायले बताए । रिलिज तार्गेट २०२४ भनिएको छ ।
मानसिक रूपमा विक्षिप्त अवस्थाको ‘साइको किलर’, जसको आफ्नै समस्याग्रस्त अतीत छ । उसले समाजमा देखाउने आफ्नो उपस्थिति र त्यसबाट उत्पन्न हुने परिस्थितिको कथामा यो चलचित्र बन्न लागेको रायले बताए । उनले यस चलचित्रमा ‘ट्विस्ट एन्ड टर्न’को भरपुर प्रयोग गरी शानदार अनुभव दिलाउन कुनै कसर बाँकी नराख्ने बताए ।
दक्षिण भारतीय चलचित्र सङ्गीतका प्रख्यात एजे अलीमिर्जाक नौशाद अलीले सङ्गीत दिने यस चलचित्रमा दक्षिण भारतीय चलचित्रका पार्श्व गायक गायिका साई भिग्नेश, पद्मलताले स्वर दिनेछन् । साई चर्चित चलचित्र ‘कान्तारा’को गीत ‘बराह रूपम’ र पद्मलता चलचित्र ‘थानी ओरूभन’को ‘कान्नाला कान्नाला’ गीतबाट चिनिन्छन् ।
दक्षिण भारतीय फिल्मकै प्रख्यात सिनेमाटोग्राफर आकाश कुमारको डिओपी रहने ‘म्याउँ’मा लक्ष्मण सुनारले एशोसियट निर्देशन तथा सम्पादन गर्नेछन् ।
यो फिल्म चीनमा पनि रिलिज हुने बताइएको छ । जसको लागि चिनिया वितरक साउथ एसिया मेरीटाईम सिल्क रोड (फुजियान) ईन्टरनेसनल मिडिया को. लि. चलचित्रमा आबद्ध भइसकेको निर्माण टिम बताउँछ ।
जेनी खतिवडा राय, केन्द्र रेग्मी र प्रिन्स कुमार चौधरी सह निर्माता रहेको फिल्मकी कार्यकारी निर्माता निशा खतिवडा हुन् । भुटानी फिल्ममा अनुभव लिएका सुमन माझीको साउन्ड डिजाइन र सुदिप भण्डारीको भिएफएक्स रहनेछ ।
