‘पशुपति प्रसाद २ : भष्मे डन’ दर्शकमाझ, आक्रामक विजनेसको अपेक्षा

काठमाडौं । वर्ष २०८० को सर्वाधिक प्रतिक्षा गरिएको फिल्म ‘पशुपति प्रसाद २ : भष्मे डन’ शनिबारबाट दर्शकमाझ आएको छ । दशैंको फूलपातीको अबसरमा प्रदर्शनमा आएको फिल्मको ओपनिङ आक्रामक छ । अधिकांश मर्निङ शोजहरूमा फिल्मले ८० प्रतिशतमाथिको अकुपेन्सी कायम राख्यो ।

अग्रिम बुकिङ हेर्दा फिल्मले आक्रामक ओपनिङको प्रक्षेपण गरिएको छ । यो फिल्म ७ वर्षअघि प्रदर्शनमा आएको सुपरहिट फिल्म ‘पशुपतिप्रसाद’को सिक्वेल हो । दीपेन्द्र के खनालको निर्देशनमा बनेको फिल्मको कथा खगेन्द्र लामिछानेले लेखेका हुन् । लामिछाने ‘पशुपतिप्रसाद’मा प्रमुख पात्र थिए, यो पटक केमियो भुमिकामा देखिनेछन् ।

यो फिल्ममा विपिन कार्की, स्वस्तिमा खड्का, सौगात मल्ल, रविन्द्र सिंह बानियाँ, माओत्से गुरुङ, प्रकाश घिमिरे, लोकेन्द्र लेखक, मिस्श्री थापा, सजन थापा मगर, विभु पौडेल लगायतको अभिनय छ ।