निर्माण पहिले रोहित अधिकारीको ‘फर्की फर्की’ रिलिज घोषणा
काठमाडौं । अनमोल केसीको प।रमुख अभिनय रहने फिल्म ‘फर्की फर्की’को प्रदर्शन मिति तय गरिएको छ । निर्माण कम्पनि रोहित अधिकारी फिल्मस् ले फिल्मको प्रदर्सन मिति तय गरेको हो । यो फिल्म अर्को बर्ष २०८१ सालको जेठ ११ गते रिलिज हुने निर्माता रोहित अधिकारीले बताए । वितरकसँग सल्लाह गरेर फिल्मलाई जेठमा रिलिज गर्न लागेको उनले बताए ।
यसैबीच फिल्मको वर्कशप पनि सुरु भएको छ । वर्कशपमा मुख्य अभिनेता अनमोल केसी, नव–कलाकारद्धय रवि काफ्ले र समृद्धि अर्याल जोडिएका छन् । मुख्य अभिनेत्री जसिता गुरुङले भने केही दिनमै वर्कशप सुरु गर्ने निर्माण पक्षले बताएको छ । फिल्मलाई सुयोग गुरुङले निर्देशन गर्नेछन् ।
यो फिल्मको छायांकन काठमाडौं, पोखरा, अन्नपूर्ण बेस क्याम्पमा गरिनेछ । साथमा, एउटा गीतको छायांकन इन्डोनेसियाको बालीमा गरिने निर्माणपक्षले बताएको छ । रोहित अधिकारी र ओम प्रकाश अग्रवालको निर्माणमा तयार हुन लागेको फिल्मका सह–निर्मातामा मनोज वली र राम न्यौपाने रहनेछन् । फिल्ममा नरेन्द्र मैनालीको छायांकन, रोमन बज्राचार्य, नरेन लिम्बु र अनमोल गुरुङको संगीत रहनेछ ।
फिल्मको छायांकन मंसिरको १ गतेबाट सुरु गर्ने तयारी निर्माणपक्षको छ । ‘गाजलु र छ माया छपक्कै’ जस्ता सुपरहिट फिल्म दिएका निर्माता अधिकारीले यसपटक दर्शकले प्रेमको कथामा बेग्लै स्वाद पाउने बताए । फिल्मलाई काठमाडौंमा काफिया फिल्मस् र मोफसलमा कुबेर फिल्मस् ले वितरण गर्नेछ । फिल्मको अन्तरराष्ट्रिय वितरकको रुपमा एमएसएम इन्टरटेन्मेन्ट जोडिएको छ ।
