‘पशुपति प्रसाद २ : भष्मे डन’को ‘प्रेम शरणम्’ सार्वजनिक |भिडियो
काठमाडौं । दशैंको छेकोमा आगामी कार्तिक ४ बाट प्रदर्शनको तयारीमा रहेको फिल्म ‘पशुपति प्रसाद २ : भष्मे डन’मा समावेश दोस्रो गीत सार्वजनिक गरिएको छ । सार्वजनिक ‘प्रेम शरणम्’ बोलको गीतमा मुख्य अभिनेता विपिन कार्की र अभिनेत्री स्वस्तिमा खड्का फिचर्ड छन् ।
र्यापको समिश्रण रहेको गीतमा कृष्ण भारद्धाजको संगीत तथा सुशिल पौडेल र संगीतकार भारद्धाजको शब्द रचना रहँदा कालीप्रसाद बाँस्कोटा र स्वस्तिका ढकालले स्वर भरेका छन् । प्रविण सिंहको कोरियोग्राफी र निरज कँडेलको डिओपी रहेको गीतको अडियो र भिडियोको तालमेल राम्रो देखिन्छ ।
हिट फिल्म ‘पशुपति प्रसाद’को सिक्वेलको रूपमा आउँदै गरेको यो फिल्म दर्शकमाझ प्रतिक्षित छ । यो फिल्मले ‘पशुपति प्रसाद’को मृत्यु पश्चात पशुपति क्षेत्रमा आफ्नो अस्तित्व स्थापित गर्न संघर्षरत ‘भष्मे डन’को जीवनमा एउटा रोमाञ्चक पात्रको प्रवेशपछि सुरु भएको परिचय र आत्मसम्मानको लागि गर्ने शक्ति संघर्षको कथामा निर्माण गरिएको हो ।
दीपेन्द्र के खनालको निर्देशनमा निर्माण भएको ‘पशुपति प्रसाद २ : भष्मे डन’मा विपिन र स्वस्तिमासँगै सौगात मल्ल, रविन्द्र सिंह बानियाँ, माओत्से गुरुङ, प्रकास घिमिरे, लोकेन्द्र लेखक, मिस्श्री थापा, सजन थापा मगर, विभु पौडेल, प्रकाश दाहालको पनि अभिनय रहेको छ । फिल्ममा अभिनेता तथा निर्माता खगेन्द्र लामिछाने र अभिनेत्री बर्षा सिवाकोटी पनि विशेष भुमिकामा देखिनेछन् ।
निरज कँडेलको डिओपी, कृष्ण थापाको छायांकन, दीर्घ खड्काको सम्पादन, कृष्ण भारद्वाजको संगीत रहेको फिल्म टुकी आर्ट्सको ब्यानरमा अभिनेता खगेन्द्र लामिछानेको लेखन तथा निर्माणमा बनेको हो ।
