‘ऐचो पैंचो’को ‘काले केटा’ सार्वजनिकः स्वस्तिमा र वर्षादेखि मुकुनसम्मको ठूम्का
भदौ १४ लाई प्रदर्शन मिति तोकेको फिल्म ‘ऐचो पैंचो’मा समावेश डान्सिङ नम्बर ‘काले केटाले’ सार्वजनिक गरिएको छ । राजधानीमा बिहिबार आयोजित एक कार्यक्रमबीच निर्माण टिमले फिल्मको दोस्रो चल प्रचार सामग्री सार्वजनिक गर्यो । यसअघी फिल्मको टिजर सार्वजनिक गरिएको थियो ।
सार्वजनिक गीतमा फिल्ममा मुख्य कलाकार सबैजसो फिचर्ड छन् । अभिनेत्री वर्षा राउत, स्वस्तिमा खड्का अभिनेताद्वय मुकुन भुषाल र सुशील सिटौलासहितका कलाकारलाई गीतमा देख्न सकिन्छ । गीतमा कोरियोग्राफी कविराज गहतराजले गरेका छन् ।
सार्वजनिक गीतमा संगीत आशिष अविरलको छ भने स्वरमा आशिषलाई अस्मिता अधिकारीले साथ दिएकी छिन् । गीतमा शब्द एकनारायण भण्डारीले लेखेका छन् ।
केपी फिल्मस् को ब्यानरमा निर्माण भएको फिल्मलाई कृषा चौलागाईंले निर्देशन गरेकी हुन् । यो फिल्ममा कोशिष क्षेत्री, राजाराम पौडेल, शारदा गिरी, बुद्धि तामाङ, रमेश बुढाथोकी, सरिता गिरी, विशाल पहारी, रविन्द्र झा, सुमन मोटे पनि अभिनयमा छन् ।
पुरुषोत्तम प्रधानले छायांकन गरेको ‘ऐंचो पैंचो’मा सम्पादन विपिन मल्ल र भुपेन्द्र अधिकारीको छ भने कथा अभिमन्यू निरवीको हो । प्रितम लामिछाने र आध्या लामिछाने फिल्मका निर्माता हुन् ।
