वक्सअफिसमा ‘परस्त्री’को हरिबिजोग

गत बिहिबारबाट प्रदर्शनमा आएको फिल्म ‘परस्त्री’ फ्लपको बाटोमा अघि बढेको छ । फिल्मले प्रदर्शनको पहिलो तीन दिनमा जम्मा पाँच लाख आसपासको मात्रै कमाई गरेको छ । फिल्मको सुरुवात सुखद रहेन ।

पहिलो दिन जम्मा एक लाख ५६ हजारको कमाई गरेको फिल्मले अन्य दुई दिनमा तीन लाख ७५ हजार मात्रै नेट विजनेस गर्न सक्यो । झरीको बहाना बनेपनि इनिसियल विजनेसमै दर्शकले चासो नदेखाएपछि फिल्मले लगानीको १० प्रतिशत पनि कलेक्सन नगर्ने देखिएको हो ।

सुरज पाण्डेको निर्देशनमा बनेको फिल्मले विवाहेत्तर कथा पेस गर्छ । शर्मिला पाण्डे फिल्मकी निर्माता हुन् । दिपेन्द्र के खनालको लेखनमा बनेको फिल्ममा कोशिश क्षेत्री, शिल्पा मास्के, गौरव विष्ट प्रमुख कलाकार छन् । फिल्मले भारतमा पनि हिन्दी भाषामा प्रदर्शन थालनी गरेको बताइए पनि वलिउड विजनेसमा कुनै कुरा उल्लेख छैन ।