नेपालसँगै विदेशमा ‘प्रसाद २’, जापान प्रदर्शन तय
नेपाली दर्शकमाझ प्रदर्शनरत फिल्म ‘प्रसाद २’ को अन्तर्राष्ट्रिय प्रदर्शन सुरू भएको छ । मे महिनाबाट अष्ट्रेलियासँगै मध्यपूर्वका देशहरूमा प्रदर्शन हुन लागेको फिल्मको जापान प्रदर्शन मिति पनि तय भएको छ ।
‘प्रसाद २’ जापानमा अर्को महिना (जुन २ तारिख)मा फिल्मको प्रदर्शन तय भएको जापान प्रदर्शन अधिकार लिएका नेपाली फिल्म निर्माता ईश्वर श्रेष्ठले जानकारी दिए । उक्त मितिमा यो फिल्म जापानको राजधानी टोकियो स्थित नकानो जिरो हलमा प्रदर्शन हुनेछ ।
प्रदर्शन मिति नजिकिँदै गर्दा जापानमा रहेका नेपाली समुदायमाझ फिल्मको प्रचारलाई अघि बढाउँदै लगिएको श्रेष्ठले बताए । फिल्म ‘लाहुरे’ र ‘सायद २’ का निर्माता रहेका श्रेष्ठ विगत लामो समयदेखि जापानमा नेपाली फिल्मको प्रदर्शन र प्रवर्धनमा सकृय छन् ।
