सर्दासर्दै दशैं पुग्यो ‘परदेशी २’, भष्मे डन’सँग हुनेछ भिडन्त !
गत असोजमा यसैबर्षको दशैंमा रिलिज हुने घोषणाकाबीच रिलिज सारिएको फिल्म ‘परदेशी २’ पुनः अघिल्लो महिना फागुनको १९ मा रिलिज हुने घोा णा भयो । उक्त मितिमा पनि अन्य ठुला मानिएका फिल्मसँग निर्माण टिम जुध्न ढुक्क हुन सकेन । उक्त मितिमा पनि फिल्मको रिलिज टर्यो ।
अब पुनः निर्माण टिमले लामो अन्तर राख्दै आगामी बर्षको दशैंमा फिल्म ल्याउने घोषणा गरेको छ । हालै निर्देशक तथा निर्माता नारायण रायमाझीले एक भिडियो सन्देश जारी गर्दै परदेशीहरूको पीडा बोल्ने फिल्म दशैं रिलिजले नै अर्थ राख्ने घुमाउरो सन्देश छोड्दै नयाँ मिति सार्वजनिक गरेका छन् ।
आगामी कात्तिक ४ गते बडा दशैं सुरु हुने फूलपातीको दिन हो । उक्त मितिमा हाल छायांकनरत फिल्म ‘पशुपति प्रसाद २ : भष्मे डन’ पनि प्रदर्शन हुने निर्माण टिमले घोषणा गरिसकेको छ । दशैंको छेको हुँदा उक्त मितिमा यी दुई फिल्ममात्रै प्रदर्शन हुन्छन् भन्ने अहिले नै टुंगो भने हुनेछैन ।
‘परदेशी २’मा प्रकाश सपुत, नीर शाह, रमा थपलिया, केकी अधिकारी, वर्षा सिवाकोटी, दीलिप रायमाझी, प्रशान्त तामाङ्ग, सुशील पोखरेल, सविन बास्तोला, भीमा मैनाली, देवेन्द्र बब्लु, रोशनी कार्कीलगायतको अभिनय छ । राजेश बंशल र नारायण रायमाझीले फिल्मको निर्माण गरेका हुन् ।
नारायण इन्टरनेशनलको प्रस्तुतिमा बनेको फिल्मको कथा रमेश बिजीले लेखेका हुन् । बि.बि. अनुरागीको संगीत रहेको फिल्ममा दीर्घ खड्काको सम्पादन र मानकृष्ण महर्जनले छायांकन छ ।
