‘बुलाकी’ को मर्मस्पर्शी गीत गल्ती मेरो छैन’ सार्वजनिक |भिडियो
कर्णाली तथा सुदुर पश्चिममा विधमान जारीप्रथाको कथामा तयार भएको फिल्म ‘बुलाकी’ आगामी बैशाख १ बाट प्रदर्शन हुँदैछ । पोस्टर हुँदै टिजर रिलिजसम्म आउँदा संभावनावान बनेको फिल्मको शुक्रबार गीत सार्वजनिक गरिएको छ ।
‘गल्ती मेरो छैन, दुनियाँलाई सम्झाइ देउन’ बोलको मर्मस्पर्शी गीतलाई लिरिकल रूपमा निर्माण टिमले दर्शकमाझ ल्याएको हो । सार्वजनिक गीतमा मनछुने शब्द समावेश छन्, संगीतको मधुरता दर्शक तथा श्रोता लोभ्याउने छ ।
गीतमा स्वर बादल थापाको छ भने शब्द लेखन र संगीत संयोजनमा बादललाई सुविन सेन्चुरीले साथ दिएका छन् । गीतको भिडियोलाई लक्ष्मण सुनारले सम्पादन गरेका छन् ।
गीतको भिडियोमा प्रमुख पात्रहरूः नरेन खड्का, सुरक्षा पन्त विराज विष्ट लगायत फिचर्ड छन् । लक्ष्मण सुनारको निर्देशनमा तयार भएको फिल्म स्व. मोति बिष्टको प्रस्तुति र टोपेन्द्र बिष्टको निर्माणमा तयार भएको हो । फिल्मको कथा राजबहादुर सानेको हो ।
यो फिल्ममा नरेन, सुरक्षा र विराजसँगै प्रकाश कँडेल, रमेश बुढाथोकी, सरस्वती खत्री, सुशील पोखरेल, लक्ष्मी गिरी, कुलदीप अधिकारी, झलनाथ खत्री, उपासना वाइबा,सोनु सेढाइ, धनबहादुर राई, वसन्त परियार, लक्ष्मण देवकोटा लगायतलाई पनि देख्न सकिनेछ ।
शिव ढकालले खिचेको फिल्ममा गोविन्द मधुर आचार्य, श्रीकृष्ण बम मल्ल र बादल थापाको संगीत समावेश छ । फिल्मको सम्पुर्णजसो छायांकन पश्चिम नेपालको जाजरकोट, रुकुम र डोल्पामा गरिएको छ ।
अर्जुन जिसीले सम्पादन रहेको फिल्मलाई काठमाडौंमा त्रिनेत्रम डिष्ट्रिव्युसन र मोफसलमा एफडी कम्पनिले वितरणको जिम्मा लिएका छन् ।
