‘फूलबारी’ अग्रिम बुकिङ खुल्ला, धेरै शोज पाउन बिदाकै भर !
यहि फागुन ५ गतेबाट सार्वजनिक प्रदर्शनमा आउन लागेको फिल्म ‘फूलबारी’लाई मल्टिप्लेक्सम हलहरूले अग्रिम बुकिङ खोलेका छन् । मल्टिप्लेक्स हलहरूले फिल्मको बुकिङ आइतबार नै खुलाउँदा फिल्मले मध्यम स्थान पाएको छ ।
बलिउड फिल्म ‘शेहजादा’ र हलिउड फिल्म ‘एन्ट-म्यान एण्ड द वास्प : क्वान्टुमेनिया’ पनि एकै मितिमा रिलिज हुँदा ‘फूलबारी’ले आशातित शोजहरू भने पाएको छैन । देशको सबैभन्दा ठुलो मल्टिप्लेक्सम चेन कयुएफएक्सले यो फिल्मलाई ३१ शोज उपलब्ध गराएको छ । अन्य मल्टिप्लेक्स आइएनआइ सिनेमाजमा ९, वान सिनेमाजमा ८, सिनेप्लेक्समा ७, बिग मुभिजले ६ शोज दिँदा रन्जना सिनेप्लेक्सले ५ र बिएसआर मुभिजले २ शो दिएका छन् ।
वर्ड अफ माउथ उच्च रहेको खण्डमा रिलिजको हप्ता पर्ने बिदाको दिनमा फिल्मको शोज बढ्दै जाने निर्माण टिमको अपेक्षा छ । रामबाबु गुरुङ निर्देशित फिल्ममा स्टार कलाकारहरूको जम्बो टिम समावेश छ ।
विपिन कार्की, अरुणा कार्की, प्रियंका कार्की, दयाहाङ राई, गौमाया गुरुङ, शिल्पा मास्के, अनुपम शर्मा, सोमनाथ खनाल, मनिष ढकाल, लोकेन्द्र लेखक लगायतका कलाकारहरूले यो फिल्ममा अभिनय गरेका छन् ।
उपेन्द्र सुब्बाको लेखन र कमल किशोर मलपानीको कन्सेप्टमा निर्मित फिल्ममा जोस हेरुमको छायांकन, कालीप्रसाद बाँस्कोटा रअनुपम शर्माको संगीत र निमेष श्रेष्ठको सम्पादन छ । यसोदा फिल्म्सको व्यानरमा निर्माण गरिएको फिल्मका कार्यकारी निर्माता मणिराम पोखरेल हुन् भने निर्मातामा मनिष ढकाल छन् ।
