‘बुलाकी’ बैशाख १ रिलिज घोषणा, पाँच फिल्मको भिडन्त पक्का
यसअघि फागुन १९ मा प्रदर्शन घोषणा गरेको फिल्म ‘बुलाकी’ रिलिज हेरफेर भएको छ । निर्माता विराज विष्टले सामाजिक सञ्जालमा फिल्मको नयाँ पोस्टर सार्वजनिक गर्दै आगामी नयाँ वर्ष २०८० को पहिलो दिन बैशाख १ मा फिल्म रिलिज गर्ने घोषणा गरेका छन् ।
नेपाली फिल्म डिष्ट्रिव्यूसनमा पाइला चालेको त्रिनेत्रम डिष्ट्रिव्यूसनको तर्फबाट वितरण हुन लागेको ‘बुलाकी’ फिल्म प्रदर्शनमा ठुलो पर्व मानिने नयाँ वर्षमा रिलिज हुँदा अन्य चार फिल्मसँग प्रतिस्पर्धा गर्नेछ । उक्त मितिमा यसअघि नै ‘नाईं नभन्नू ल ६’, ‘प्रसाद २’, ‘जारी’ र ‘बिहे पास’ले प्रदर्शन तोकेका छन् । सोहि मितिमा आउने भनिएको ‘भगवत् गीता’ भने अब प्रदर्शन नहुने निश्चित भएको छ ।
मुख्य कलाकार समेत रहेका निर्माता विष्टले यहि माघ २७ गते फिल्मको टिजर सार्वजनिक गरेर प्रचार थालनी गर्ने बताए । यो फिल्मले फर्स्टलुक पोस्टर सार्वजनिक भएसँगै सुरुवातमै चर्चा कमाएको थियो ।
लक्ष्मण सुनारको निर्देशनमा बनेको फिल्ममा सुरक्षा पन्त, नरेन खड्का, विराज विष्ट, प्रकाश कँडेल, रमेश बुढाथोकी, सुशील पोखरेल, लक्ष्मी गिरी, कुलदीप अधिकारी, झलनाथ खत्री, सरस्वती खत्री लगायत अभिनयमा छन् ।
छत्रेश्वरी म्यानेज्मेन्टको ब्यानरमा निर्माण भएको फिल्ममा शिव ढकालको छायांकन छ । निर्देशक सुनारको कथामा बनेको फिल्मको पटकथा तथा संवाद लेखनमा सुनारसँगै राजबहादुर साने र विराज विष्ट छन् । यो फिल्मले मुख्यतः पश्चिम नेपालको कर्णालीमा हालसम्म पनि यथावत रहेको ‘जारी प्रथा’को कथा बोल्छ। केन्द्रीय पात्रको रुपमा रहेकी अभिनेत्री पन्तको वरीपरी नै फिल्म घुम्नेछ। फिल्मको सम्पुर्ण छायांकन कर्णाली नेपालको जाजरकोट,रुकुम पश्चिम र डोल्पामा गरिएको छ ।
