दयाहाङ र सौगातपछि ‘हात्तीछाप’मा उपासनाको इन्ट्रि

किरण नेपालीको निर्माणमा बन्न लागेको फिल्म ‘हात्तीछाप’को मुख्य अभिनेत्रीमा उपासना सिंह ठकुरी भित्रिएकी छिन् । निर्माण टिमले उपासनासँग कागजी सम्झौता गरेसँगै मुख्य लाइनअप पूरा भएको जानकारी गराएको छ ।

यो फिल्ममा यसअघि नै दयाहाङ राई र सौगात मल्ल मुख्य अभिनेतामा अनुबन्ध भइसकेका छन् । नेपालकै निर्माणमा बनेर सफल रिलिज फिल्म ‘दुई नम्बरी’ कै प्रमुख कलाकार यो फिल्ममा पनि दोहोरिएका हुन् ।

सिमोस सुनवारको निर्देशन रहने फिल्मले सामाजिक कथा बोल्नेछ । यो फिल्मका अन्य कलाकारमा हालसम्म वुद्धि तामाङ, पुष्कर गुरुङ र प्रकाश घिमिरे फाइनल भएका छन् । नेपालीसँगै दीपक मनाङे र अमलादेवी राई निर्माता रहने फिल्ममा प्रदीप भारद्वाजको पटकथा तथा संवाद रहनेछ ।