प्रिमियरमा ‘महापुरूष’को चौतर्फी तारिफ, डेब्यू ब्वाईको उत्कृष्ट प्रस्तुती !
फिल्म ‘महापुरूष’ ले प्रिमियरमा उत्कृष्ट प्रतिक्रिया पाएको छ । आइतबार राजधानीमा आयोजित प्रिमियरमा फिल्म हेर्ने कलाकार तथा दिग्गज व्यक्तित्वहरूले फिल्मलाई उत्कृष्ट भनेका छन् ।
रिलिजको पाँच दिन पहिले गरिएको प्रिमियरमा निर्देशक निश्चल बस्नेतले फिल्मको प्रशंसा गरे । उनले निर्देशक प्रदीप भट्टराईलाई अर्को ब्लकबस्टर फिल्म दिएको भन्दै बधाई सम्म दिए ।
अभिनेत्री स्वस्तिमा खड्का र वेनिशा हमालले निर्देशकिय पाटो अब्बल भन्दै सम्पूर्ण कलाकारहरूको कामबाट सन्तुष्टि मिलेको बताए ।
नवअभिनेता अरूण क्षेत्री प्रसंशाको मुख्य पात्र बनेका छन् । उनले डेब्यू फिल्ममा नै देखाएको संभावना र मेहनतलाई धेरैले उच्च प्रशंसा गरेका छन् । प्रिमियर प्रतिक्रियाले फिल्मलाई लामो रेसको घोडाको रूपमा उभ्याएको छ ।
फिल्ममा मह जोडीसँगै अरूण क्षेत्री, रविन्द्र सिंह बानियाँ, शिखा तामाङ, कोपिला थापा, शिरु विष्ट, कविता श्रेष्ठ, नरेन्द्र कंसाकार, सविन बास्तोला, नरेश पौड्याल, प्रेम पाण्डे, सुमन रिमाल लगायतको अभिनय छ ।
षट्कोण आर्ट्सको व्यानरमा निर्मित फिल्मका कार्यकारी निर्माता रबिन्द्र सिंह बानियाँ हुन् भने निर्माता म्याक्स दिपेश खत्री हुन् । फिल्मले एकल पिताको बुढ्यौली उमेरमा अंकुराएको प्रेम र विवाह गर्ने चाहनापछि उत्पन्न परिस्थितिलाई बोलेको छ ।
