‘तिम्रो मेरो साथ’ पोस्टर रिलिज, स्विमिङ पुलमा साम्राज्ञी र पुष्पको मादकता !
रमेश एमके पौडेल निर्देशित फिल्म ‘तिम्रो मेरो साथ’को पोस्टर सार्वजनिक गरिएको छ । तिहारको अवसर पारेर आइतवार सार्वजनिक गरिएको पोस्टरमा फिल्मका मुख्य अभिनेता पुष्प खड्का र अभिनेत्री साम्राज्ञी आरएल शाहलाई स्विमिङ पुलमा हट अवतारमा देख्न सकिन्छ ।
आगामी पुष २९ गतेलाई प्रदर्शन मिति घोषणा गरिएको यस फिल्मको पहिलो गीत लक्ष्मीपूजाको अवसर पारेर सोमवार सार्वजनिक गर्ने तयारी निर्माण टिमको छ । फिल्ममा पुष्प र साम्राज्ञीका अलवा सन्दिप क्षेत्री, खड्क बहादुर पुन (खबपु), इमिली लामा, सरोज खनालको अभिनय छ भने विशेष भूमिकामा ध्रुव दत्तले अभिनय गरेका छन् । पुष्प र साम्राज्ञीले यसअघि फिल्म ‘मारुनी’मा एकसाथ काम गरेका थिए ।
फिल्म ‘तिम्रो मेरो साथ’को कथा निर्देशक पौडेल स्वंयमको हो । निर्माता समेत रहेका पौडेलले गीत रचना पनि गरेका छन् ।
आर्यन फिल्मस तथा बोधी एचडी अमेरिकाको ब्यानरमा निर्मित यस फिल्मको निर्मातामा पासाङ लामा र सह-निर्मातामा निरू भण्डारी, अशोक पोखरेल, सुमन पौडेल र सुधिर पराजुली छन् । कार्यकारी निर्माता सविर श्रेष्ठको पटकथा र संवाद रहेको फिल्ममा शिव ढकालको छायांकन छ ।
