महजोडी स्टारर ‘महापुरूष’ ट्रेलर सार्वजनिक
महजोडी स्टारर फिल्म ‘महापुरुष’को ट्रेलर सार्वजनिक भएको छ । सोमवार सार्वजनिक ट्रेलरले अभिभावक र सन्तानको कथा बोलेको छ ।
छोराको बिहे गर्ने समयमा ढल्किँदो उमेरमा प्रेममा परेका बावुको अंकुराएको प्रेम र बिहे गर्ने निर्णयपछि उत्पन्न हुने उतार चढावलाई फिल्मले बोलेको संकेत ट्रेलरले गरेको छ । मदनकृष्ण श्रेष्ठ र हरिवंश आचार्य मुख्य कलाकार हुन् । प्रदीप भट्टराईको निर्देशनमा फिल्म तयार भएको हो ।
आगामी कात्तिक ११ लाई प्रदर्शन मिति तोकेको फिल्ममा रविन्द्र सिंह बानियाँ, अन्जना बराइली, राजाराम पौडेल, शिखा तामाङ, कोपिला थापा, शिरु विष्ट, कविता श्रेष्ठ, नरेन्द्र कंसाकार, सविन बास्तोला, नरेश पौड्याल लगायतका कलाकार अभिनयमा छन् ।
षट्कोण आर्ट्सको व्यानरमा निर्मित फिल्मका कार्यकारी निर्माता रबिन्द्र सिंह बानियाँ छन् भने निर्मातामा म्याक्स दिपेश खत्री छन् । दीपक बज्राचार्यको छायांकनमा तयार भएको फिल्ममा मित्र डि. गुरुङको सम्पादन छ ।
