‘झिंगे दाउ’लाई प्रिमियरमा प्रसंशा, सेलिब्रेटीले दिए अर्गानिक फिल्मको ट्याग
ज्ञानेन्द्र देउजाको निर्देशनमा तयार भएको फिल्म ‘झिंगे दाउ’ यहि शुक्रबारबाट प्रदर्शनको तयारीमा छ । साहित्यकार भिमनिधि तिवारीको कृतिमा आधारित यो फिल्म रिलिजको पुर्व सन्ध्यामा निर्माण टिमले बुधबार राजधानीमा भव्य प्रिमियर गर्यो ।
देशका चर्चीत सेलिब्रेटी, सञ्चारकर्मी तथा विभिन्न क्षेत्रका विशिष्ट व्याक्तिहरूको उपस्थितिमा सम्पन्न प्रिमियरमा फिल्मले राम्रो प्रतिक्रिया पाएको छ । फिल्म हेर्ने दर्शकहरूले निर्देशक, कलाकार सबैको तारिफ गरे । अभिनेता दीपकराज गिरी र अभिनेत्री निर्देशक दीपाश्री निरौंलाले धेरैपछि उत्कृष्ट फिल्म हेर्न पाएको भन्दै दर्शकलाई हात जोडेरै फिल्म हेरिदिन बिन्ति गरे । दीपाले यो फिल्मलाई खास अर्गानिक फिल्म बोलिन् ।
अभिनेत्री स्वस्तिमा खड्का, रीमा विश्वकर्माले फिल्ममा केकी अधिकारी, आँचल शर्माले निभाएको भुमिकाको प्रसंशा गरे । निर्माता आकाश अधिकारी, नवल खड्का, निर्देशक नरेश पौडेल लगायतले लामो समयपछि निर्देशनमा फर्केका ज्ञानेन्द्र देउजाको कामको उच्च स्वरले प्रसंशा गरे । फिल्मले कथावस्तुमा पूर्ण न्याय गरेको, कलाकारहरूले लोभलाग्तो काम देखाएको अधिकांश दर्शकको प्रतिक्रिया थियो ।
कलाकार आयन खड्का, केकी अधिकारी, हिउंवाला गौतम, आँचल शर्मा, मुकुन भुषाल, अभय बराल, संगम भण्डारी, अंशु थापा, नव अभिनेता कुशल विष्ट तारिफका पात्र बनेका छन् । प्रिमियरमा पाएको प्रतिक्रियाले उत्साहित रहेको भन्दै निर्देशक देउजाले हलमा पनि दर्शकको सोहि प्रकारको माया पाउने आशा राखेका छन् । फिल्मको अग्रिम बुकिङ खुल्ला भइसक्दा क्युएफएक्सले आफ्नो चेनमा २६ शोज उपलब्ध गराएको छ ।
