‘प्रेमगीत ३’ हिन्दी डब ट्रेलर सार्वजनिक |भिडियो
नेपाल र भारतमा एकसाथ प्रदर्शन हुन लागेको फिल्म ‘प्रेमगीत ३’ को ‘हिन्दी डब’ ट्रेलर सार्वजनिक गरिएको छ । भारत केन्द्रीत दर्शकलाई लक्षित गरि सार्वजनिक गरिएको १ मिनेट ५८ सेकेण्डको ट्रेलरमा प्रेम र राजकीय द्वन्द्वको पाटोलाई देखाइएको छ ।
यसअघि सार्वजनिक टिजरमा नेपालीमा भन्दा बढि हिन्दी डबिङमा दर्शकले आकर्षण देखाएपछि निर्माण टिमले हिन्दी भाषामा रेकर्ड गरिएको ट्रेलर सार्वजनिक गरेको हो । यो फिल्ममा हिन्दी भाषामा पछिल्लो समय नेपालमा सर्वाधिक हेरिन थालिएका दक्षिण भारतीय फिल्ममा हिन्दी डब गराउने कलाकारहरूले आवाज दिएका छन् ।
आगामी असोज ७ गते (सेप्टेम्बर २३)बाट नेपाल र भारतका दर्शकमाझ सार्वजनिक प्रदर्शनमा आउने यो फिल्म पछिल्लो समय सर्वाधिक चर्चामा छ । कुनै पनि नेपाली फिल्म पहिलो पटक भारतमा औपचारिक प्रदर्शन हुन लागेको यो पहिलो पटक हो ।
सन्तोष सेनको निर्माण रहेको यो फिल्ममा दिवंगत छेतेन गुरुङ र सेनको संयुक्त निर्देशन छ । प्रदीप खड्का, क्रिष्टिना गुरुङ, मनिष राउत, सुनिल थापा, शिव श्रेष्ठ, अनुभव रेग्मी, सन्तोष सेन, माओत्से गुरुङ, पुस्कर कार्की, प्रेम पुरी, लक्ष्मी वर्देवा, जीवन भट्टराई लगायतको अभिनय छ ।
हिमाल केसीको द्वन्द्व निर्देशन रहेको फिल्मलाई राजेश श्रेष्ठले छायांकन गरेका हुन् । हिन्दी भाषामा डबिङ हुँदा निर्मातामा शुभाष काले, प्रशान्त गुप्ता, सुष्मा शिरोमनी, मुरली तिल्वानी, योगेश लेखानी समेत जोडिएका छन् । निर्माता तथा निर्देशक सेन र अभिनेता खड्का यतिबेला फिल्मको प्रचारको लागि भारतमा छन् ।
