‘प्रेमगीत ३’मय सामाजिक सञ्जाल, हिन्दी टिजरमा दर्शकको आकर्षण

पछिल्लो केहि हप्तायता नेपाली फिल्म ‘प्रेमगीत ३’ चौतर्फी चर्चामा छ । देशदेखि विदेशसम्म फिल्मले हाइप पाउँदा रिलिजपछि फिल्मको वक्स अफिस विजनेसलाई लिएर अड्कलबाजी समेत सुरू भइसकेको छ ।

विश्व फिल्म बजारको ठुलो मार्केट रहेको भारतमा पहिलोपटक औपचारिक रूपमा कुनै पनि नेपाली फिल्मले स्थान बनाउन लाग्दै गर्दा ‘प्रेमगीत ३’ले वलिउड बजारमा समेत जबरजस्त रूपमा आफ्नो उपस्थिति जनाएको छ । मुम्बई शहरमा टाँगिएका ठुला ठुला होर्डिङले ध्यान खिच्न सफल फिल्मको हालै सार्वजनिक टिजरले अर्को गर्मिलो माहोल जन्माएको छ । शनिबार सार्वजनिक यो फिल्मको नेपाली र ‘हिन्दी’ टिजर यतिबेला सामाजिक सञ्जालमा ट्रेण्डिङ बहस बनिरहेका छन् ।

दुईबर्ष पहिले ‘न्यारेसन’सहितको नेपाली टिजर फालेको निर्माण टिमले शनिबार डायलग सहित दुई भाषामा टिजर रिलिज गर्यो । जहाँ नेपालमा पछिल्लो क्रममा युट्युवमा सर्वाधिक हेरिने दक्षिण भारतीय फिल्ममा स्वराङ्कन गरेका कलाकारहरूको जबरजस्त डायलग नेपाली फिल्ममा जोडिएको छ । जसका कारण नेपाली भन्दा बढि हिन्दी टिजरमा दर्शक तथा फिल्म चिन्तकहरूको आकर्षण देखिएको छ ।

हिन्दी टिजरः

‘कपीराइट्स फ्रि’ टिजर यतिबेला युट्युव र सामाजिक सञ्जालमा छ्याप्छ्याप्ती छ । ओएसआर डिजिटल मार्फत सार्वजनिक नेपाली भाषाको टिजर १ मिलियन भ्यूज नजिक पुग्दा हिन्दी भाषाको टिजरको भ्यूज काउण्ट बाहिर छ । सयौं च्यानलमा यो टिजर अपलोड भएको छ । नेपाली सामाजिक सञ्जाल प्रयोगकर्ताहरूले नेपाली भन्दा ‘हिन्दी डब’ टिजरलाई प्राथमिकताका साथ सेयर गर्दै ‘वाउ’ लेखेका छन् ।

नेपाली टिजरः

फिल्मको टिजरले प्राप्त प्रतिक्रियाबाट निर्माण टिम उत्साहित छ । निर्देशक निर्माता सन्तोष सेनले सामाजिक सञ्जालमा भारतीय दर्शकले टिजरमा देखाएको प्रतिक्रियाहरू सेयर गर्दै सन्तुष्टीका शब्दहरू व्यक्त गरेका छन् । अभिनेता प्रदीप खड्का फिल्मको मुख्य केन्द्र छन् । सुनिल थापा, क्रिष्टिना गुरुङ, शिव श्रेष्ठ, अनुभव रेग्मी, मनिष राउत लगायत अभिनयमा रहेको यो फिल्म आगामी असोज ७ गते (सेप्टेम्बर २३) तारिखबाट नेपाल र भारतमा एकसाथ प्रदर्शनमा आउनेछ । सेनसँगै दिवंगत निर्देशक छेतेन गुरुङ फिल्मका निर्देशक हुन् ।