‘लाखे’ भदौ रिलिज पोष्टपोण्ड, नयाँ मिति घोषणा
सम्राट बस्नेत निर्देशित फिल्म ‘लाखे’को पुर्वघोषित प्रदर्शन मिति हेरफेर भएको छ । प्राविधिक काम नसकिएको भन्दै निर्माण टिमले भदौ ३१ लाई तोकेको प्रदर्शन मिति पोष्टपोण्ड गर्दै नयाँ मिति तोकेको छ । फिल्म अब कार्तिक ११ गते प्रदर्शनमा आउनेछ ।
फिल्मका निर्देशक बस्नेतले हाल फिल्मको भिएफएक्स तथा मिक्सिङको काम मुम्बईमा भइरहेको र पुर्वघोषित मितिमा फिल्म तयार भइनसक्ने भएकोले मिति हेरफेर गरिएको बताए । फिल्मलाई पूर्णरूपमा तयार गर्न समय लाग्ने भएकोले रिलिजलाई हतार नगर्ने निर्णयमा निर्माण टिम पुगेको बस्नेतले बताएका छन् ।
फिल्मलाई नेपालीसँगै हिन्दी भाषामा पनि डबिङ गरिने र भारतमा पनि प्रदर्शन गर्ने तयारीबीच निर्माण टिमले मुम्बईमा फिल्मको प्राविधिक कार्यलाई अघि बढाइरहेको छ । यो फिल्मलाई वितरण गर्ने अधिकार आर आर फिल्मस् ले खरिद गरेको छ । गणेश मल्ल ठकुरीको प्रस्तुतिमा निर्माण भएको यो फिल्मका निर्माता सिजन अर्याल छन् ।
यो फिल्ममा सौगात मल्ल, अनुपविक्रम शाही, आर्यन अधिकारी, वर्षा राउत, अर्पण थापा, सुशील सिटौला, प्रशान्त ताम्राकार, विजय बराल लिड अभिनयमा छन् । ग्लोवल मिडिया एण्ड रिसर्च सेन्टर र औरियन प्रोडक्सनको ब्यानरको तर्फबाट ‘लाखे’ निर्माण भएको हो ।
