मंगलबार प्रधानमन्त्री तथा नेपाली कांग्रेसका सभापति शेरबहादुर देउवाको हातबाट टिका ग्रहण गर्दै अभिनेत्री श्वेता खड्का नेपाली कांग्रेसका प्रवेश गरिन् । केहि सिनियर चलचित्रकर्मी र श्रीमान विजयन्द्र सिंह रावतसँगै श्वेताले कांग्रेसको सदस्यता लिएकी हुन् ।
देशकै ठुलो लोकतान्त्रिक पार्टी भनिने कांग्रेस प्रवेशसँगै श्वेताले सामाजिक सञ्जालमा लामो स्टाटस लेखेर आफ्नो राजनीतिक यात्राको सुरुवातलाई प्रष्ट्याएकी छिन् । श्वेताले स्टाटसमा कांग्रेस पार्टी प्रवेशलाई ‘कलाकारले कलाकारिता मात्रै गर्नुपर्छ राजनीति गर्नुहुन्न भन्ने धारणाको प्रतिवाद लेखेकी छिन् । राजनीतिबाट जति नै टाढा रहन खोजेपनी सबैको हरेक दैनिकीमा राजनीतिक प्रभाव रहने भन्दै त्यो प्रभावलाई कदापी नकार्न नसकिने उनको भनाई छ ।
महामानव बिपी कोईरालाको विचारधारालाई आत्मसाथ गर्दै उहाँकै विचारधारामा आफुलाई समाहित गर्दै कांग्रेस प्रवेश गरेको श्वेताले लेखेकी छिन् । निर्णय लिनु भन्दा अगाडि आफुले धेरैपटक स्व:संवाद, स्व:विश्लेषण र स्व:विचार गरेको भन्दै उनि लेख्छिन्ः ‘मेरो अन्तरमनको कुनामा लुकेको सामाजिक विकास , परिवर्तन र रुपान्तरणको चाहनाले मलाई राजनीतिको प्रभावबाट कुनै ब्यक्ती टाढा हुन सक्दैन भन्ने भाव उत्पन्न गरायो ।’
कांग्रेसमा आवद्धतासँगै फरक बिचार राख्ने कुनै व्यक्ति वा दलप्रती आफ्नो कुनै पुर्वाग्रह नरहने भन्दै उनले ‘जो जहाँ रहेपनी, जो जता गएपनि, देश र जनताको निमित्त निस्वार्थ भावले काम गर्न सकौं।’ लेखेकी छिन् । यो बीचमा आउने सकारात्मक र नकारात्मक दुबै प्रकारका प्रतिक्रियालाई आत्मसाथ गर्ने श्वेताको भनाई छ ।
(तश्वीरः श्वेता खड्काको फेसबुक)
श्वेताको स्टाटसको पूर्णपाठः
कलाकारिता, ब्यवसाय अनी समाजिक सेवाको बाटो हुँदै म यतिखेर खुल्ला राजनैतीक मुलधारमा प्रबेश गरेकी छु । बिद्यार्थी जीवनदेखिनै महामानव बिशेस्वर प्रसाद कोईरालाको बारेमा पढ्दै र सुन्दै आईरहेकी मैले अन्तत: उनै महामानवको बिचारधारामा आफुलाई समाहित गर्दै नेपाली काँग्रेशसंग आफ्नो आवद्दता जनाएकी छु । मैले लिएको यो राजनैतीक निर्णय प्रती बिभिन्न कृया र प्रतिकृयाहरु अवस्यनै प्राप्त हुनेछन् । यसरी प्राप्त हुने साकारात्मक र नकारात्मक दुबै किसिमका प्रतिकृयाहरुलाई म सुझावको रुपमा ग्रहण गर्दै मेरो राजनैतीक यात्रालाई अगाडि बढाउने प्रण गर्दछु।
एउटा कलाकारले कुनै एक पार्टीको ब्यानर भित्र समाहित हुनुहुन्न भन्ने सोच ब्याप्त छ । कलाकारले कलाकारितानै गर्नु पर्छ राजनीति गर्नुहुन्न भन्ने धारणाको प्रतिवाद स्वरुप मैले नेपाली काँग्रेशको राजननैतीक सिद्दान्तमा आफुलाई समाहित गराएकी छु । यो निर्णय लिनु भन्दा अगाडि मैले धेरै पटक स्व:संवाद, स्व:बिश्लेशण र स्व:बिचार गरेकी छु । मेरो अन्तरमनको कुनामा लुकेको सामाजिक बिकास , परिवर्तन र रुपान्तरणको चाहनाले मलाई राजनीतिको प्रभावबाट कुनै ब्यक्ती टाढा हुन सक्दैन भन्ने भाव उत्पन्न गरायो । हामीले राजनीतिबाट जतिनै टाढा रहन खोजेपनी हाम्रो हरेक दैनिकीमा राजनीतिको प्रभाव रहेको हुन्छनै । त्यो प्रभावलाई हामी कदापी नकार्न सक्दैनौ । अत:राजनैतीको यो अछुण्ण प्रभावलाई आत्मसाथ गर्दै मैले आफ्नो पाइला अगाडि बढाएकी हुँ । मेरो यो पाइलामा आम परिवर्तनकारी, बिकासप्रेमी तथा बुद्दिजिवी बर्गको साथ सल्लाह र सुझाव पाउने आशा बोकेकी छु ।
राजनिती बिसुद्द ‘सामाजिक सेवा’को क्षेत्रहो नकी ‘ब्यवसायिक पेशा’ । राजनीतिलाई कमाई गरी खाने माध्यमको रुपमा प्रयोग गरी अकुत सम्पत्तिको आर्जनमा लिप्त हुने भ्रष्ट राजनीतिज्ञहरुलाई बिस्थापित गराउनको निमित्त अब हामी आफु पनि अग्रसर हुनु पर्ने आवश्यकता महशुष गरेकी छु । सँधै राजनीतिलाई ‘फोहोरी खेल’को रुपमा परिभाषित गर्दै नेताहरु प्रती ‘धारे हात’ लगाउने अनी गालीको बर्षा गर्ने हाम्रो निष्कृय प्रवित्तीलाई त्याग्ने बेला आएको छ । सिस्टम (प्रणाली) परिवर्तनको लागि सिस्टम निर्माणकै एउटा हिंस्सा हुनु जरुरीछ । यस्को लागि राजनीतिनै एउटा उत्तम माद्यम हो। मैले यही माद्यमलाई आत्मसाथ गरेकी हुँ । यस्को लागि मैले आदरणिय बिपी कोइराला, गणेशमान शिहँ र कृष्ण प्रशाद भट्टराईको पथमा आफ्नो पाइला अगाडि बढाएकी छु ।
मलाई थाहा छ, कुनै पनि राजनैतिक दलको संस्थागत सिद्दान्त खराब हुँदैन । त्यो सिद्दान्तलाई कार्यान्वयन गर्ने केही नेतृत्वकर्ताको ब्यक्तिगत आचरण मात्र खराब हो । एमाले, काँग्रेश, माओवादी, रा.प्र.पा लगायत सबै दलका संस्थागत सिद्दान्तहरु राम्रा छन् । सबै दलले बिकास, सम्बृद्दी र परिवर्तनको एजेण्डा उठाएका छन तर ति एजेण्डाहरु कार्यान्वयन तहमा असफल भएका मात्र हुन्। यही असफलताका कारण उधोग, ब्यवसाय, कलाकारिता, कृषि तथा पर्यटन लगायतका सबै क्षेत्रहरु प्रभावित भएका छन् । हाम्रो दैनिक ब्यक्तिगत जीवनमा पनि यस्को प्रत्यक्ष नकारात्मक प्रभाव परिरहेको छ । अत:केही सिमित ब्यक्तिहरुको स्वार्थका कारण असफल भएका ति एजेण्डाहरुलाई सफल बनाउनको निमित्त हामी सबैको सकृयताको खाँचो छ । पोखरी फोहर भयो भनेर पोखरीको ‘ लेउ ‘लाई गाली गर्नु भन्दा त्यो लेउ हटाउन आँफैले पोखरी भित्र छिर्ने हिम्मत गर्नु पर्छ । अत: सबै पार्टीमा धेरथोर लेउ लागेको छ त्यस्को सरसफाइको लागि हाम्रो सकृयता खाँचो छ ।
मैले आफ्नो राजनैतीक सकृयताको लागि भने नेपाली काँग्रेशलाई चुनेकी छु । मेरो पारिवारिक पृष्ठभुमीले पनि मलाई नेपाली काँग्रेशको सिद्दान्तलाई अंगाल्न सहयोग पुगेको हो । नेपालको राजनैतिक परिवर्तनमा अहमम् भूमिका खेल्ने नेपाली काँग्रेश जस्तो बिशाल पार्टीमा मलाई स्थान दिने आदरणीय पार्टी सभापती तथा सम्माननीय प्रधानमन्त्री श्री शेर बहादुर देउवाज्यु प्रती हार्दिक आभार ब्यक्त गर्दछु । साथै मेरो ब्यवसायिक, सामाजिक तथा राजनैतिक यात्राको लागि मलाई संधै हिम्मत,हौशला र उर्जा प्रदान गर्ने मेरो परिवार गण, मेरा अग्रज ब्यक्तित्वहरु लगायत मेरा शुभचिन्तकहरु प्रती म हार्दिक नमन गर्दछु । विगतका दिनमा मैले यो पार्टीको लागि ब्यक्तिगत रुपमा त्यस्तो ठुलो योगदान दिन सकेकी छैन । आगामी दिनमा भने म मेरो मन बचन र कर्मले भ्याए सम्मको योगदान दिने प्रयास गर्नेछु । नेपाली काँग्रेशको निती, सिद्दान्त र यस्को मुल्य मान्यतालाई आत्मसाथ गर्दै कुनै ब्यक्तिगत स्वार्थहरु नराखी स्वच्छ रुपमा सामाजिक बिकास र बिसुद्द ‘सेवा’ को भाव बोकेर आफुलाई एउटा असल कार्यकर्ताको रुपमा चिनाउने प्रयासमा कुनै कमी हुने छैन । साथै, म एउटा कलाकार र ब्यवसायी पनि भएको नाताले यस् दलभित्र रहेर तमाम ब्यवसायी र कलाकर्मीहरुको हक हितको निमित्त आफ्नो आवाज बुलंद गर्नेछु । सामाजिक सेवाको पाटोलाई अझ शसक्त रुपमा अगाडि बढाउनको निमित्त नेपाली काँग्रेशसंगको आवद्दताले मलाई थप मार्ग प्रसस्त गराउनेमा विश्वस्त छु ।
अन्तमा: हरेक ब्यक्तिलाई आ-आफ्नो राजनैतिक स्वतन्त्रता छ । मेरो बैचारिक सिद्दान्तसंग मेल खाने राजनैतीक दलसंगको निकटता, आवद्दता वा सहकार्य पस्चात् पनि फरक बिचार राख्ने कुनै ब्यक्ती वा दल प्रती मेरो कुनै पुर्वाग्रह रहने छैन। जो जहाँ रहेपनी, जो जता गय पनि, देश र जनताको निमित्त निस्वार्थ भावले काम गर्न सकौं । जय नेपाल !
