ऋचा स्टारर ‘कौसीद’ रिलिज पोष्टपोण्ड
ऋचा शर्मा स्टारर फिल्म ‘कौसीद’ रिलिज पोष्टपोण्ड भएको छ । निर्देशक कुमार भाष्करले यसअघि तोकिएको मिति जेठ २७ मा फिल्म प्रदर्शन नहुने पुष्टि गरे ।
फिल्मलाई थप राम्रो र स्तरीय बनाउन साउण्डदेखि कलरसम्म पुनः काम गरिरहेका छौं, भाष्करले भने, ‘उक्त मितिसम्म फिल्म तयार हुन नै समय लाग्ने देखियो, पब्लिसिटीमा दिने समय पनि निकाल्न गाह्रो पर्यो, त्यसैले तत्काललाई प्रदर्शन रोक्ने निर्णयमा पुगौका छौँ ।’ उनका अनुसार फिल्म अब विदेशका विभिन्न ठाउँमा प्रदर्शनपछि मात्रै नेपालमा रिलिज हुनेछ । यसअघि नै फिल्मको जापान र अष्ट्रेलिया प्रिमियरको तयारी भइसकेको निर्देशकले बताए ।
यो फिल्ममा ऋचासँगै भोलाराज सापकोटा, रुपेश दाहाल, परिक्षित विक्रम राणा, सदिक्षा गौतम, निर्भिक भट्टराई र सागर भट्टराई मुख्य भुमिकामा छन् । केदार भुसालको निर्माणमा तयार भएको यो फिल्मको कार्यकारी निर्मातामा दिमेश श्रेष्ठ तथा सह-निर्मातामा लक्ष्मण बानियाँ रहेका छन् ।
फिल्मको कथा लेखन नव विजय प्रकाश श्रेष्ठ र धिर्जन थपलियाले गरेका छन् । निसाल पौडेलले छायांकन गरेको फिल्ममा मित्र डि. गुरुङ र भिम विश्वकर्माको सम्पादन रहेको छ । बड पिक्चर्सको ब्यानरमा फिल्म ‘कौसीद’ निर्माण भएको हो । आर आर फिल्मस् ले फिल्म ‘कौसीद’को वितरण अधिकार लिएको छ ।
