अनुपले सार्वजनिक गरे ‘मायाको माया’ !
अभिनेता अनुपबिक्रम शाही एक हप्ताको सिक्किम बसाईपछि केहि दिन पहिले मात्रै काठमाडौं फर्केका छन् । फिल्म ‘लाखे’को सुटिङ सकेर महिना दिन नबित्दै ‘हिमालय रोडिज’को ग्राण्ड फिनालीमा व्यस्त भएका अनुपले उक्त रियालिटी शोमा आफ्नै ‘टिम रेड’लाई विजयी बनाउन सफल भए ।
सिक्किम निवासी नसिव तामाङलाई आफ्नो टिमबाट विजेता बनाउन सफल हुँदा अनुप नसिवसँगै सिक्किम पुगेर सम्मान थाप्नमा व्यस्त थिए । यो बीचमा अनुपले होस्ट गर्ने ‘एडभेञ्चर्स ट्राभल शो’को समाचारले पनि मिडियामा चर्चा पायो । यो बीचमा उनि एक नयाँ फिल्ममा अभिनेत्री आना शर्मासँग रोमान्समा देखिने खबर पनि बाहिरियो । उल्लेखित कुराहरुले नै पछिल्लो समय अनुपको व्यस्तता प्रमाणित गर्छ ।
मंगलबार मात्रै उक्त फिल्मको नाम आउट भएको छ । अनुपले सामाजिक सञ्जालमा स्टोरी सेयर गरेका छन् जहाँ उक्त फिल्मको नाम ‘मायाको माया’ स्पष्ट देख्न सकिन्छ । निर्माण टिमबाट फिल्मको नाम र कास्ट एण्ड क्रू गोप्य राख्ने प्रयास सफल नहुँदा मंगलबार मूहर्त भइसकेको कुरा बाहिर आएको छ ।
रोहित करण वैधको निर्देशन रहने फिल्मको ललितपुर स्थित कार्यविनायक मन्दिरमा मूहर्त भएको अनुपको स्टोरीले बोलेको छ । फिल्ममा अनुप र आना बाहेक अन्य को-को कलाकार रहने खुलाइएको छैन । निर्माण टिमले छिट्टै नै प्रेसमिट गरेर सबैकुरा बाहिर ल्याउने बताएको छ ।
