‘शमशेर’मा प्रकाश शाहको इन्ट्री
निर्माण घोषणासँगै कलाकारहरुको क्यारेक्टर पोस्टर सार्वजनिक गरेको फिल्म ‘शमशेर’मा ‘साङ्लो’ र ‘लभ स्टेशन’ अभिनेता प्रकाश शाहको इन्ट्री भएको छ । केहि दिन पहिले मात्रै सम्पन्न ‘डि सिने अवार्ड’मा उत्कृष्ट नेगेटिभ रोलमा अवार्ड विजेता शाह हालै यो फिल्ममा अनुबन्ध भएका हुन् ।
शाहले पहिलो रिलिज फिल्म ‘लभ स्टेशन’मा निभाएको भुमिकाले पनि चर्चा पाएको थियो । आकर्षक जीउडाल र लुक्सका धनी उनि नेगेटिभ रोलमा चुनौतीपुर्ण अभिनय पस्किँदै उदायका अभिनेता हुन् ।
शाहसँगै फिल्ममा एभरेष्ट फिल्म एकेडेमीका विद्यार्थी सुमन थापा पनि अनुबन्धित भएका छन् । दुवै जनाले फिल्ममा आफ्नो राम्रो र चुनौती पुर्ण प्रस्तुति भएकाले काम गर्न राजी भएको बताए । फिल्मको मुख्य भुमिकामा यसअघि नै अभिनेता मनिष राउत र गौरव पहारी अनुबन्धित भैरहेका छन् । फिल्मको लागि हाल मुख्य अभिनेत्री र निर्देशकको खोजी भैरहेको निर्माण टिमले बताएको छ ।
एक्सन जनरामा निर्माण गरिने फिल्ममा एभरेष्ट फिल्म एकेडेमी र डी आर डेनिमको व्यानरको लगानी रहनेछ । यो फिल्ममा हिमेश पन्त, सुमन गौतम, सबिन शाक्य, रुपेश कार्की, रुपेश लामा, आशिस पराजुली लगायतका कलाकारको पनि अभिनय रहनेछ ।
काठमाडौँ, दुबई, सोलुखुम्बु र ढोरपाटनमा खिचिने फिल्म निर्देशक र मुख्य अभिनेत्री टुंगो लागेसँगै फ्लोरमा जाने बताइएको छ ।
