उच्च सुविधासहित दरबारमार्गमा खुल्यो ‘दरबार सिनेम्याक्स’
नयाँ बर्ष ०७९ को अबसर पारेर बिहीबारदेखि दरबार मार्गस्थित दरबार मलमा अत्याधुनीक सुविधा सम्पन्न मल्टिप्लेक्स सिनेमा हल ‘दरबार सिनेम्याक्स’ सञ्चालनमा आएको छ । बिगत अढाइ दशकदेखि ग्वार्कोमा गुण सिनेमा हल संचालन गरिरहेको गुण ग्रुपकै स्वामित्वको ‘दरबार सिनेम्याक्स’ को व्यवस्थापन भने क्युएफएक्सले गरेको छ ।
५० र ५३ सिट क्षमताका दुईटा हलमा अत्याधुनीक प्रबिधिका साउन्ड सिस्टम,फोल्डिङ सिट र स्क्रिन जडित छन् । ‘दरबार सिनेम्याक्स’ का प्रबन्ध निर्देशक दीप्रश शाक्यले दर्शकले हलमा आफ्नो इच्छा अनुसार सिट फोल्ड गरेर फिल्म हेर्न पाउनुका साथै अर्डर अनुसार सिटमै खाना तथा वार सेवा समेत उपलब्ध रहेको जानकारी दिएका छन् ।
गुण ग्रुपका प्रमुख राजेन्द्र (दिजेन्द्र) शाक्य,प्रबन्ध निर्देशक दीप्रश लगायत शाक्य परिवारले पूजाआजा गरि हलको शुभारम्भ गरेका थिए । कार्यक्रममा फिल्म निर्माता छबिराज ओझा,पत्रकार प्रकाश सुवेदी,टीकाराम नेती,चलचित्र पत्रकार तथा निर्माता,सञ्चारकर्मी निर्देशक लक्ष्मण सुवेदीलगायतका ब्यक्तित्वको उपस्थिति थियो ।
प्रबन्ध निर्देशक शाक्यले दर्शकको रुचि,सुरक्षा,गुणस्तरिय प्रबिधि र सुबिधालाई ध्यानमा राख्दै लक्जरीयस् हल संचालनमा ल्याइएको बताए । ‘ए मेरो हजुर–४’ र ‘केजीएफ–२’ बाट औपचारिक प्रदर्शन थालिएको पहिलो दिन बिहानको शो देखि नै दुबै हल हाउसफूल भएको जानकारी उनले दिएका छन् ।
