‘हेल्लो जीन्दगी’ले खोस्यो ‘आरआरआर’को शो, अग्रिम बुकिङ खुल्ला
यो शुक्रबारबाट प्रदर्शनमा आउन लागेको फिल्म ‘हेल्लो जीन्दगी’को अग्रिम बुकिङ खुल्ला भएको छ । मल्टिप्लेक्सहरुले फिल्मको लागि शोज उपलब्ध गराउँदै अग्रिम टिकट लिन चाहने दर्शकहरुको लागि बुकिङ खुल्ला गरेका हुन् ।
नेपाली हलहरुमा दक्षिण भारतिय फिल्म ‘आरआरआर’को दबदबा कायमै रहँदा ‘हेल्लो जीन्दगी’ले आशातित शोज भने पाउन सकेको छैन । यो फिल्मलाई देशकै ठुलो मल्टिप्लेक्स चेन क्युएफएक्सले ६ वटा शोज उपलब्ध गराएको छ । सिभिल मल, लाबिङ मल र क्युएफएक्स भक्तपुर गरि राजधानीमा ३ शो प्रदान गरेको छ भने दमौली, चितवन र नेपालगञ्जमा एक एक शो उपलब्ध गराएको छ ।
अग्रिम बुकिङमा क्युज सिनेमा र एफक्युवले हालसम्म १-१ शो मात्रै फिल्मलाई प्रदान गरेको छ । उल्लेखित सबै शोज भने फिल्मले ‘आरआरआर’को शोजहरुबाटै आफ्नो पक्षमा लिएको हो । सिङगल स्कृनहरुमा भने आफुहरुले धेरै भन्दा धेरै शोज प्राप्त गर्ने वितरण कम्पनि आर आर फिल्मस् का रोहित कट्टेलले बताए । सुरुवातमा प्राप्त शोजबाट फिल्मको मुल्यांकन नहुने भन्दै प्रदर्शनपछि हेर्ने दर्शकको ‘वर्ड अफ माउथ’ सकारात्मक हुँदा शोहरु थपिँदै जाने विश्वास कट्टेलको छ ।
एभरेष्ट सुर्य बोहराको निर्देशनमा बनेको फिल्ममा बिक्रम जोशी, दीपिका प्रसाइँ,प्रियंका कार्की, विल्सनबिक्रम राई, बिक्रान्त बस्नेत, एभरेष्ट सूर्य बोहरा, बिभिया श्रेष्ठ, सबिता गुरुङ, सनमकुमार बैराग, जानकी पन्त, मनोज केसी, ध्रुव दत्त, कुमुद पन्त लगायतको अभिनय छ ।
यथार्थ घटनामा आधारित भनिएको फिल्मलाई बिक्रम डि जोशी र हिराल जोशीले निर्माण गरेका हुन् । निर्देशक बोहरा र निर्माता तथा कलाकार जोशीको कथामा बनेको फिल्ममा छायांकन पुरुषोत्तम प्रधान र अल्बर्ट प्रसादको छ । मित्र डि गुरुङले यो फिल्मलाई सम्पादन गरेका छन् ।
