वर्षाले छोडेपछि ‘२ नम्बरी’ गर्न उपासनालाई चिट्ठा !
फिल्म ‘२ नम्बरी’मा अभिनेत्री उपासना सिंह ठकुरी भित्रिएकी छिन् । हालै मात्र अभिनेत्री वर्षा राउतले फिल्म छाडेको चर्चा चलेको थियो । उक्त चर्चा सत्य सावित हुँदा वर्षाको ठाउँ उपासनाले लिएकी हुन् ।
दयाहाङ राई र सौगात मल्ल लिड अभिनेता रहँदा यो फिल्ममा भुटानी अभिनेत्री उगेन छोदेन र उपासनाले अभिनेत्रीको भुमिका निभाउने छन् । अनमोल केसीसँग स्कृन सेयर गर्दै ‘क्याप्टेन’ फिल्मबाट रजतपटमा डेब्यू गरेकी उपासनालाई ‘कबड्डी कबड्डी कबड्डी’को अभिनयमा थप उचाइंमा पुर्याएको थियो । उपासना नेपाली फिल्म क्षेत्रकी संभावनावान अभिनेत्रीमा गनिन्छिन् ।
यसअघि पल शाह लिड अभिनयमा रहँदा नाबालिका बलात्कारको आरोपमा हिरासतमा परेपछि निर्माण टिमले उनको स्थानमा सौगातलाई लिएको थियो ।
दिपेन्द्र लामाको निर्देशनमा बन्ने फिल्मका निर्माता किरण नेपाली हुन् । दोस्रो लकडाउन पहिले केहि छायांकन भएसकेको यो फिल्मको निर्माण टिम अब भने पुनःसुरुवातबाट नै छायांकनको तयारीमा छ ।
अर्को साताबाट फ्लोरमा जाने तयारी भइरहेको निर्माण टिमले बताएको छ । यसअघि घोषित मुख्य कलाकारहरु नै परिवर्तन हुँदा फिल्मको पटकथा समेत हेरफेर गरिएको बताइएको छ ।
