पल शाहलाई थप पाँच दिन हिरासतमा राख्न अदालतबाट अनुमति
नाबालिगलाई जबरजस्ती करणी गरेको आरोप लागेका अभिनेता पल शाहलाई थप पाँच दिन हिरासतमा राखेर अनुसन्धान गर्न तनहुँ जिल्ला अदालतले अनुमति दिएको छ । तनहुँ प्रहरी कार्यालयले पछिल्लो पटक मागेको १२ दिनको समय सकिएसँगै अनुसन्धानको लागी थप ५ दिन अदालत समक्ष माग गरेको थियो ।
यसअघि तनहुँ अदालतले पहिलो पटक ७ दिन र दोस्रो पटक १२ दिन हिरासतमा राखेर अनुसन्धान गर्न प्रहरीलाई अनुमति दिएको थियो । अदालतले दोस्रो पटक १२ दिन म्याद थप गरेपछि शाहलाई तनहुँबाट अनुसन्धानका लागि नवलपरासी पनि लगिएको थियो । नाबालिगले तनहुँपछि नवलपरासी प्रहरी कार्यालयमा पनि शाहविरुद्ध जबर्जस्ती बलात्कारको आरोपमा जाहेरी दिएकी थिइन् ।
नाबालिगले दिएको जाहेरीको आधारमा पल शाहविरुद्ध बिहीवार जिल्ला अदालत नवलपरासी (बर्दघाट सुस्ता पूर्व) मा बलात्कार मुद्दा दर्ता भइसकेको छ । १६ बर्ष नपुगेकी नाबालिगलाई वलात्कारको अभियोगमा १२ देखि १४ वर्ष सजाय माग दाबी गर्दै जिल्ला सरकारी वकिलको कार्यालयले शाहविरुद्ध मुद्धा दर्ता गरेको हो ।
शाहमाथि ललाई-फकाई गरी पटक-पटक जबर्जस्ती करणी गरेको आरोप पछि अटनासँग जोडिएका स्थलमा दुबैतर्फको प्रहरीले अनुसन्धान थालेको थियो ।
