नारी दिवसमा ‘बुलाकी’: अफिसियल फर्स्टलुक सार्वजनिक
मंगलबार परेको अन्तर्राष्ट्रिय नारी दिवसको अवसर पारेर फिल्म ‘बुलाकी’को फर्स्टलुक पोस्टर सार्वजनिक गरिएको छ। नारी दिवसमा सार्वजनिक फिल्मको पोस्टर नारीप्रधान बनाइएको छ। लिड अभिनेत्री सुरक्षा पन्त भिन्न लुक्समा प्रस्तुत छिन्।
यो फिल्मले मुख्यतः पश्चिम नेपालको कर्णालीमा हालसम्म पनि यथावत रहेको ‘जारी प्रथा’को कथा बोल्छ। केन्द्रीय पात्रको रुपमा रहेकी अभिनेत्री पन्तको वरीपरी नै फिल्म घुम्नेछ। फिल्मको सम्पुर्णजसो छायांकन पश्चिम नेपालको जाजरकोट, रुकुम र डोल्पामा गरिएको छ।
लक्ष्मण सुनारको निर्देशनमा तयार भएको फिल्ममा सुरक्षासँगै नरेन खड्का र विराज बिष्ट मुख्य अभिनयमा छन्। स्व. मोति बिष्टको प्रस्तुति र टोपेन्द्र बिष्ट निर्माता रहेको फिल्ममा नरेन खड्का, सुरक्षा पन्त र बिराज बिष्ट प्रमुख भूमिकामा छन साथमा प्रकाश कँडेल, रमेश बुढाथोकी, सरस्वती खत्री, सुशील पोखरेल, लक्ष्मी गिरी, कुलदीप अधिकारी, झलनाथ खत्री, उपासना वाइबा,सोनु सेढाइ, धनबहादुर राई, वसन्त परियार, लक्ष्मण देवकोटा लगायतलाई पनि देख्न सकिनेछ।
शिव ढकालले खिचेको फिल्ममा गोविन्द मधुर आचार्य, श्रीकृष्ण बम मल्ल र बादल थापाको संगीत समावेश छ । केहि समयमै फिल्मको टिजर र रिलिज मिति सार्वजनिक गर्ने तयारी भइरहेको निर्माण ब्यानर छत्रेश्वरी म्यानेजमेन्टले जनाएको छ।
