अभिनेता विशालको पुनरागमन, ट्रेलरमा हेर्नुहोस् फिल्म ‘एक’ |भिडियो

कोरोना महामारीको कारण लामो समयदेखि फिल्म क्षेत्र ठप्प प्राय छ । हल बन्द छन्, फिल्मकर्मीहरु कोरोना सकिने र पुरानै दैनिकीमा फर्किने दिनको पर्खाइमा छन् । फिल्मजन्य गतिविधि ठप्प हुँदा धेरै कलाकारहरु म्युजिक भिडियोमा व्यस्त छन् ।

यो बीचमा फिल्मी चहलपहल बढाउन मंगलबार एक नयाँ फिल्मको ट्रेलर सार्वजनिक भएको छ । सार्वजनिक ‘एक’ नामक फिल्मको ट्रेलर मुख्यतः मधेशी विषयवस्तु केन्द्रीत छ । ट्रेलरमा लिड अभिनेता द्वय विशाल पोखरेल र प्रमोद अग्रहरी हाबी छन् । पुराना अभिनेता विशाल लामो समयको अन्तरालपछि ‘एक’ मार्फत अभिनयमा फर्केका हुन् । देश जोगाउन एउटा इमान्दार एजेन्टको संघर्ष नै पोलिटिकल जनरामा बनेको यो फिल्मको केन्द्रीय द्वन्द्व हो ।

मनोज पण्डितको निर्देशनमा तयार भएको फिल्मको कथा पनि पण्डितले नै लेखेका हुन् । आत्मा गुरागाइँ र सोफी थापा निर्माता रहँदा फिल्ममा छायांकनको काम दीपक बज्राचार्यले गरेका छन् भने सम्पादन भरतमणी रेग्मीको छ । प्रमोद खड्काको द्वन्द्व निर्देशन छ ।

फिल्म ‘एक’मा विशाल र प्रमोदसँगै ज्योत्स्ना योगी, सवीर चुरौते, प्रमोद खड्का, विश्वान्त पोखरेल, मदन ठाकुर, सुरेश शाह, रामशरण पाठक र हरोण अली अभिनयमा छन् । घटस्थापनाको अबसरमा आगामी असोज २१ बाट यो फिल्म दर्शकले हेर्न पाउनेछन् ।

फिल्म हलहरु बन्द रहेको समयमा ओटिटी प्लेटफर्ममा रिलिज हुन लागेको यो फिल्मलाई दर्शकले सिनेमाघर एप्लिकेसन, डिस होम, नेटटिभी, भाए टिबी, म्याक्स टिभी र ओहो मुभिजको माध्यमबाट घरमै बसेर हेर्न सक्नेछन् ।

ट्रेलर हेर्नुहोस्ः

https://youtu.be/UoTD-lu7iKY