कमलमणी र सरिताको मनछुने अभिनयमा ‘फर्कन छोरा’

चर्चित गायक राजेश पायल राईको स्वरमा ‘फर्कन छोरा’ बोलको गीतको भिडियो सार्वजनिक भएको छ । केशव शर्मा दाहालको शब्द रचना तथा संगीत रहेको यस गीतमा चन्दु गोर्खालीको संगीत संयोजन छ ।

केशव शर्मा दाहालकै प्रस्तुतिमा निर्माण भएको भिडियोको निर्देशन रंगकर्मी प्रविण खतिवडाले गरेका हुन् । भिडियोमा नाट्यकर्म तथा चलचित्रमा सक्रिय कलाकारहरु कमलमणी नेपाल र सरिता गिरीले मुख्य भूमिकामा अभिनय गरेका छन् । अभिनेता कमलमणि दाहाल चर्चित टेलीसिरियल ‘सक्किगोनि’ मार्फत ‘खुपीका बाउ’ नामले परिचित छन् । त्यस्तै अभिनेत्री सरिता गिरि पछिल्लो समय दिपेन्द्र के. खनाल निर्देशित फिल्म ‘आमा’ मा गरेको उत्कृष्ट अभिनयका कारण चर्चित छिन् ।

कमलमणी र सरिताका अलावा ‘फर्कन छोरा’ भिडियोमा अन्य रंगकर्मी कलाकारहरुको पनि अभिनय देख्न सकिन्छ । काभ्रेको रयाले, धुलिखेल, तिनपिप्ले लगायतका विभिन्न स्थानहरुमा दुइ दिन छायांकन गरिएको भिडियोका छायाँकार महेश पौडेल हुन् । पौडेल ‘मन्जरी’, ‘रणवीर’ जस्ता फिल्महरुका छायाँकार हुन् । त्यसैगरी भिडियोको सम्पादन कृष्ण भण्डारीले गरेका हुन् ।

https://youtu.be/3Fs6EPfPWqs