‘प्रकाश’ अफिसियल घोषणा, रेनुसँग जोडी बाँध्दै प्रदीप खड्का

प्रदीप खड्का मुख्य भुमिकामा रहने फिल्म ‘प्रकाश’को औपचारिक घोषणा भएको छ । राजधानीको एक तारे होटलमा मंगलबार आयोजित एक कार्यक्रमकाबीच निर्माण टिमले कलाकार सार्वजनिक गर्दै फिल्मको ओपचारिक निर्माण घोषणा गर्यो ।

दिनेश राउतको निर्देशनमा बन्न लागेको यो फिल्मको सम्पुर्ण छायांकन सुदुर पश्चिममा हुनेछ । फिल्मको कथा विकास सुवेदीले तयार पारेका हुन् । महेन्द्र अधिकारीले निर्माण गर्न लागेको फिल्म विनिस इन्टरटेन्मेन्टको ब्यानरमा बन्नेछ ।

यो फिल्ममा प्रदीपले नव अभिनेत्री रेनु योगीसँग स्कृन सेयर गर्नेछन् । फागुनको दोश्रो साताबाट फ्लोरमा जाने फिल्ममा प्रदीप र रेनुसँगै दिया मास्के, प्रकाश घिमिरे, पवित्रा खड्का, प्रशान्त श्रेष्ठ, निरज पन्थी लगायत अभिनयमा रहनेछन् । फिल्ममा ताराप्रकाश लिम्बु, एलिश कार्की र दीपक शर्माको संगीत रहनेछ । राजेश श्रेष्ठले फिल्मको छायांकन गर्नेछन् ।