स्टार क्रिकेट २०२१ः रङ्गशाला निर्माण सहयोगार्थ पिचमा उत्रिंदै सेलिब्रेटी
कलाकारद्वय सिताराम कट्टेल ‘धुर्मुस’ र कुन्जना घिमिरे ‘सुन्तली’को अगुवाइमा धुर्मुस सुन्तली फाउण्डेसन र भरतपुर महानगरपालिकाको सहकार्यमा गौतमबुद्ध अन्तराष्ट्रिय क्रिकेट रङ्गशाला निर्माण भइरहेको छ । गृष्मा ब्रोडकास्टिङको आयोजनामा रङ्गशाला निर्माणमा आर्थिक सङ्कलन गर्ने हेतुले ‘स्टार क्रिकेट २०२१’ टुर्नामेन्ट आयोजना हुने भएको छ ।
शनिवार काठमाडौँमा आयोजित प्रेसमिटमा ‘स्टार क्रिकेट २०२१’ को बारेमा जानकारी दिइएको थियो । आयोजित प्रेस मिटमा उपस्थित कलाकार र खेलाडीहरूले क्रिकेटसमेत खेलेका थिए। नेपाली फिल्म, संगीत र खेलकुदका ४० भन्दा बढी सेलेब्रेटी सहभागी हुने टुर्नामेन्टलाई दुई समूहमा विभाजन गरिएको छ ।
दुई समूहलाई धुर्मुस र सुन्तलीले नेतृत्व गर्ने छन् भने मैदानमा धुर्मुस सुन्तली बिच प्रतिस्पर्धा हुनेछ ।
एक दिवसीय मैत्रीपूर्ण क्रिकेट प्रतियोगितामा दयाहाङ राई, प्रमोद खरेल, सन्दीप क्षेत्री, दीपक विष्ट, श्रृङ्खला खतिवडा, वेनिशा हमाल, संगीना वैद्य, प्रशान्त ताम्राकार, पारस खड्का, रवि ओड, ज्ञानेन्द्र मल्ल, विनोद भण्डारीलगायतले क्रिकेट खेल्ने छन् ।
यो टुर्नामेन्ट माघ २४ गते चितवनको निर्माणाधीन रङ्गशालामा हुनेछ । टुर्नामेन्टबाट उठेको सम्पूर्ण रकम रङ्गशालाको निर्माणमा प्रदान गरिने बताइएको छ ।
