कन्फर्मः ‘चिसो मान्छे’मा स्वस्तिमासँगै अर्पण थापा फाइनल
निर्देशक दिपेन्द्र के खनाल यतिबेला फिल्म ‘चिसो मान्छे’को स्कृप्टलाई अन्तिम रुप दिँदै छन् । यो बीचमा फिल्मका लिड कलाकारहरुलाई निर्माण टिमले धमाधम अनुबन्धन गरिरहेको छ । आइतबार मात्रै लिड अभिनयमा रहनेगरी अभिनेता अर्पण थापा अनुबन्धित भएका छन् ।
निर्मात्री शर्मिला पाण्डेले सामाजिक सञ्जालमार्फत अर्पणलाई अनुबन्धन गरेको पुष्टि गरेकी छिन् । फिल्मको लिडिङ लेडीमा केहि दिन पहिले मात्रै स्वस्तिमा खड्का कन्फर्म भएकी थिइन् । त्यसो त यो फिल्मममा स्वस्तिमाले मोटो पारिश्रमिक लिएको यतिबेला सिनेवृत्तमा चर्चा छ ।
निर्मात्री पाण्डे र निर्देशक खनालसँग स्वस्तिमाको यो दोस्रो सहकार्य हो । यसअघि यो टिमले ‘लभ लभ लभ’ फिल्ममा एकसाथ काम गरेको थियो । कोभिड महामारी कम भइसकेपछि फ्लोरमा जाने भनिएको यो फिल्मलाई निर्देशक दिपेन्द्रले नै खिच्नेछन् । फिल्मको कथा पनि दिपेन्द्र एक्लैको हो । २०७८ साललाई प्रदर्शन पक्का बोलिसकिएको फिल्मलाई करण श्रेष्ठको रीच इन्टरटेन्मेन्टले वितरणको जिम्मा लिइसकेको छ ।
