छायांकन स्थगन गर्न ‘नेपाल चलचित्र निर्माता संघ’ को अनुरोध

‘नेपाल चलचित्र निर्माता संघ’ ले सुचना जारी गर्दै हाल छायांकन भइरहेका नेपाली फिल्महरुलाई केहि समयको लागि छायांकन कार्य स्थगन गर्न अनुरोध गरेको छ । हाल महामारीका रुपमा फैलिरहेको कोरोना भाइरस(कोभिड १९) को उच्च जोखिम रहेको मुलुकमा नेपाल पनि रहेको र पछिल्लो समय नेपाल सरकारकबाट जारी भएको सुचनालाई मध्यनजर गर्दै सघंले यो सुचना जारी गरेको हो ।

सघंले राज्यबाट अर्काे सूचना जारी नहुन्जेलका लागि आ–आफ्नो फिल्म छायांकन कार्य स्थगन गर्न फिल्म कर्मीहरुलाई अनुरोध गरेको हो । कोरोना भाइरसको संक्रमणबाट बच्नका लागि पारिवारिक जमघट, मेला महोत्सव, जात्रा पर्वजस्ता कार्यक्रममा सरिक नहुन र स्थगन गर्न भनि राज्यबाट जारी गरिएको सुचनालाई मध्यनजर गर्दै हुनसक्ने जोखिम न्यूनिकरण गर्नका लागि सघंले यो सुचना प्रकाशन गरेको हो ।