सर्दासर्दै चैतमा पुग्यो ‘नीरफूल’
दयाहाङ राई स्टारर फिल्म ‘नीरफूल’को प्रदर्शन मिति पुनः हेरफेर भएको छ । फिल्म अब चैत्र ७ बाट दर्शकमाझ आउनेछ । यसअघि यो फिल्म फागुन ३० मा रिलिज हुने घोषणा थियो भने त्यो पहिले ‘नीरफूल’ निर्माण टिमले गत भदौमा समेत प्रदर्शन घोषणा गरेको थियो । यो बीचमा फागुन २३ लाई पनि फिल्मको प्रदर्शन चर्चा गरियो ।
फिल्मको रिलिज मिति पटक पटक किन सर्यो त ? निर्देशक फूलमान वल भन्छन्, ‘नेपाली फिल्म उद्योगमा आपसी सहकार्यको संस्कार विकास होस् भन्ने हाम्रो चाहना हो’, हातेमालो गरेर अघि बढे सबैलाई राम्रो हुन्छ।’ फिल्मको ट्रेलर मंगलबार सार्वजनिक हुँदैछ ।
भूकम्पमा परि बिछोडिएको परिवारले पुर्नमिलनको लागि गर्ने संघर्षमा आधारित बताइएको फिल्ममा दयाहाङ राईसँगै बुद्धि तामाङ, रेखा थापा, शान्ति वाइवा, जिग्मे छ्योइकी, पुष्कर गुरुङ, राजन खतिवडा, सरिता गिरी, सरोज अर्याल, कृष्णभक्त महर्जन, रोशन फ्युबा लगायतको अभिनय छ।
फिल्मको पटकथा सचिन घिमिरे र निर्देशक वलले लेखेका हुन् भने सचिन एसोसिएट निर्देशकको रुपमा पनि छन्। फ्रेन्डस् अफ नेपाल–म्यान्मार फ्रेन्डसिप काउन्सिलसितको सहकार्यमा सेलो प्रोडक्सनले निर्माण गरेको फिल्ममा सोनाम डोमा कार्यकारी निर्माता छिन् ।
