‘कारखाना’ निर्देशकले घोषणा गरे ‘प्रेमपूजा’, को हुन अनुहार छोप्ने हिरो ?
‘कारखाना’ फेम्ड निर्देशक अमरदिप सापकोटाले फिल्म ‘प्रेमपूजा’ निर्माण घोषणा गरेका छन् । शुक्रबार परेको महाशिवरात्रीको अबसरमा फिल्मको फर्स्टलुक भन्दै थिम पोस्टर पनि सार्वजनिक गरियो । जहाँ लिड अभिनेता अनुहार छोपेको अवस्थामा छन् ।
एक्सन लभस्टोरी जनरामा बन्ने भनिएको फिल्मको कास्ट एण्ड क्रू सार्वजनिक गरिएको छैन । शुभसाइत भन्दै निर्माण कम्पनि इन्टरटेन्मेन्ट वर्ल्डवाइडले हाललाई पोस्टर सार्वजनिक गर्दै निर्माण भीडमा उपस्थिती जनाएको हो । फिल्मको कथा अभिमन्यु निरवीले लेखेका छन् ।
यो फिल्म आगामी बैशाख पहिलो साताबाट फ्लोरमा जाने बताइएको छ । निर्देशक सापकोटाले छिट्टै नै कलाकार तथा टिम सार्वजनिक गर्ने बताएका छन् । उनका अनुसार फिल्ममा लिड अभिनेता परिचित हुँदा अभिनेत्रीमा नयाँ अनुहार नेपाली रजतपटले पाउनेछ । सापकोटाले फिल्ममा नयाँ र पुराना कलाकारहरुको समिश्रण हुने बताए । पोस्टरमा भने दर्शकमा कौतुहलता छोड्न अभिनेताको अनुहार आधा छोपेको उनको भनाइ छ ।
काठमाडौं, चितवन र भारतको बनारसमा छायाछकन हुने भनिएको फिल्मको प्रदर्शन मिति समेत निर्माण टिमले घोषणा गरेको छ । सार्वजनिक मिति अनुसार यो फिल्म अर्को बर्षको (दुर्गापूजा) दशैँमा प्रदर्शनमा आउनेछ । तर उक्त मितिमा यसअघि नै ३ ठुला फिल्मले आफ्नो प्रदर्शन तय गर्दा ‘प्रेमपूजा’ आउने नआउनेमा शंका छ ।
