फ्राइडे रिलिज ‘दि कर्मा’, पर्दामा परमिताको कमब्याक

फ्राइडे रिलिज अन्तर्गत यो हप्ताको लागी नेपाली फिल्म ‘दि कर्मा’ प्रदर्शनमा आएको छ । माघ महिना लागेसँगै पर्दामा नेपाली फिल्मको प्रदर्शन संख्या बढ्दै जाँदा ‘दि कर्मा’ शुक्रबार रिलिज भयो ।

हलमा संख्या मात्रै वृद्धि तर चहलपहल राम्रो नभइरहेको अवस्थामा यो फिल्मले कस्तो माहोल बनाउँछ त्यो इनिसियल बिजनेसले बताउनेछ । देवकुमार श्रेष्ठको निर्देशनमा बनेको फिल्ममा जयराज रायको निर्माण छ ।

यो फिल्मबाट केहि समयको अन्तरालमा अभिनेत्री परमिता आर. एल. रानाले पर्दामा पुनरागमन गर्दैछिन् । ‘चपली हाइट २’ डेब्यू गर्ल परमिता त्यसयता ‘चङ्गाचेट’ र अन्तिम पटक ‘दि म्यान प्रम काठमाडौं’मा देखिएकी थिइन् । तर गत बर्षको चैत्रमा रिलिज उनको पछिल्लो फिल्म दर्शकले अस्विकार गरेका थिए । यो पटक नेगेटिभ भुमिका निभाएकी परमितालाई दर्शकको साथ कति मिल्छ हेर्न बाँकी छ ।a

परमितासँगै नीता ढुङ्गाना, बुद्दी तामाङ, जयराज, करण वर्मा, संगीता नापित, अनुप सक्सेना लगायतका कलाकारहरुको यो फिल्ममा अभिनय छ । ‘दि कर्मा’को पटकथा तथा संवाद सुशिल पोखरेलको हो । फिल्ममा रामेश्वर कार्कीको छायांकन छ ।