‘छ माया छपक्कै’ निर्देशकको ‘२ नम्बरी’ घोषणा, पर्दामा एकसाथ दयाहाङ, पल र बर्षा
‘छ माया छपक्कै’, ‘गोपी’ र ‘घामपानी’ निर्देशक दिपेन्द्र लामाले नयाँ फिल्म घोषणा गरेका छन् । दयाहाङ राई, बुद्धि तामाङ, पल शाह र बर्षा राउत लिड अभिनयमा रहनेगरी फिल्म ‘२ नम्बरी’को घोषणा भयो ।
राजधानीमा सोमबार आयोजित प्रेस भेटघाटकाबीच निर्माण टिमले कास्ट एण्ड क्रू पनि सार्वजनिक गर्यो । किरण नेपालीको प्रस्तुतिमा निर्माण हुन लागेको फिल्ममा रोहित कट्टेल र सरोज नेपाली निर्माता छन् । रत्न श्रेष्ठ कार्यकारी निर्माता रहनेछन् ।
‘एउटा सुन्दर गाउँका २ जना साथी, उनीहरुको मित्रता र दुश्मनीको कथामा यो फिल्म तयार हुनेछ, निर्देशक लामाले भने, ‘ साथमा फिल्मले समाजमा हुने गरेका २ नम्बरी कामलाई पनि विषयउठान गर्नेछ ।’ नाम ‘२ नम्बरी’ भएपनि यसलाई नेगेटिभ रुपमा हेर्न नहुने निर्देशक लामाले बताए । उनले, यसलाई मित्रताको कथाको रुपमा वुझ्न सबैसँग आग्रह गरे ।
कलाकारहरुले फिल्मको कथा मन परेपछि आफुहरु काम गर्न तयार भएको बताए । फिल्म रेड वर्ड प्रोडक्शन र आरआर फिल्म प्रोडक्शनको ब्यानरमा निर्माण हुनेछ । फिल्ममा सुशन प्रजापतिको छायांकन रहँदा रामजी लामिछानेलेक कोरियोग्राफीको जिम्मा सम्हाल्नेछन् । यहि माघ २५ गतेबाट फ्लोरमा जाने फिल्मलाई अर्को बर्षको जनैपुर्णिमामा प्रदर्शन लक्षय निर्माण टिमले लिएको छ ।
