’पर्खि बसें २’ निर्माण घोषणा, रीच इन्टरटेन्मेन्टले लियो वितरणको जिम्मा
गोपीकृष्ण मुभिजको ब्यानरमा निर्मित फिल्म ’पर्खि बसें’ को नयाँ सिरिज दर्शकमाझ आउने भएको छ । गोपीकृष्ण मुभिजले हिमालयन मुभी स्टुडियोसँगको सहकार्यमा ’पर्खि बसें २’ निर्माण गर्ने भएको छ । गोपीकृष्ण मुभिजको तर्फबाट निकिता पौडेल र हिमालयन मुभी स्टुडियोका विनोद सापकोटाबीच बिहिबार सहमती भएको हो ।
फिल्ममा निकिता र विनोद निर्माता रहनेछन् भने प्रदीप दाहाल र तिर्थ प्रसाद पौडेल सह निर्माताको रुपमा रहनेछन् । बिक्रम संवत २०६४ को चैत्र अन्तिममा प्रदर्शनमा आएको फिल्म ’पर्खि बसें’ लाई दीपक श्रेष्ठले निर्देशन गरेका थिए भने यसको दोस्रो सिरिजलाई ’लभ डायरिज’ निर्देशक सौरभ चौधरीले निर्देशन गर्ने भएका छन् । फिल्ममा कथा पनि उनकै रहनेछ ।
पहिलो सिरिज झैँ दोस्रोमा पनि सांगीतिक प्रेमकथा देखाइने सौरभले बताए । फिल्मलाई अल नेपाल वितरणको जिम्मा करण श्रेष्ठ अर्थात रीच इन्टरटेन्मेन्टले पाएको छ । फिल्ममा रहने कलाकार र प्राविधिक औपचारिक कार्यक्रमको आयोजना गर्दै सार्वजनिक गर्ने टिमले बताएको छ । यसको पहिलो सिरिजमा राजवल्लभ कोइराला , युना उप्रेती , निखिल उप्रेती लगायतको अभिनय थियो ।
